Kryetari i Komunës së Vushtrrisë, Xhafer Tahiri,  ka bërë me dije se tani e tutje qytetarët e kësaj komune faturën për taksën e mbeturinave do të mund ta paguajnë edhe nëpërmjet Postës së Kosovës pa provizion.

Ai ka treguar se kjo është bërë e mundur përmes nënshkrimit të marrëveshjes me drejtorin e Postës së Kosovës, Sejdi Hoxha.

Sipas Tahirit, pagesa e faturave në postë shmang radhën e pritjes në komunë dhe ulë rrezikun e keqpërdorimeve.

“Nga tani e tutje qytetarët e Vushtrrisë faturën për taksën e mbeturinave do të mund ta paguajnë edhe nëpërmjet Postës së Kosovës, pa provizion. Për këtë sot kam nënshkruar marrëveshje me drejtorin e Postës së Kosovës. Me këtë komuna lehtëson pagesën e taksës së mbeturinave për qytetarët, shmang radhën e pritjes në komunë dhe ulë rrezikun e keqpërdorimeve”, ka shkruar Tahiri në llogarinë e vet në “Facebook”.

/Epoka e re/