Edhe pse po bëhen një muaj që kur mësimdhënësit kanë hyrë në grevë, presidentja Vjosa Osmani vazhdon të mos e thotë asnjë fjalë.

Ajo që nga fillimi i grevës e ka pasur vetëm një takim me grevistët, për t’u rreshtuar më pas drejt qëndrimeve të kryeministrit Albin Kurti.

Krejt çka ka deklaruar ajo, ishte se Qeveria e ka bërë punën e saj me ndarjen e 50 eurove për secilin të punësuar në sektorin publik.

Osmani nga ajo ditë më nuk e ka thënë asnjë fjalë.

Ajo sot, është lajmëruar nga SHBA, ku ka theksuar se ka nderuar viktimat e 11 shtatorit.

Postimi plotë i Osmanit

“Asnjë ditë e vetme nuk do t’i fshijë nga kujtesa e kohës”/ Virgil

Kjo thënie e Virgjilit e vendosur në ballë të Memorialit 9/11, është thirrje për kujtesë të përhershme.

Mbi 3 mijë jetë të shuara në sulmin e 11 shtatorit 2001, na kthejnë kujtesën e na grishin ndërgjegjen sa e çmuar është liria!

Shkallët e mbijetesës, druri i vetëm i mbijetuar, fotografi të të zhdukurve, një automjet zjarrfikësish përbëjnë një pjesë të ekspozitës së tmerrit nga sulmet e 11 shtatorit 2001.

E kaluara gërshetohet me të tashmen, dhimbja me krenarinë, kujtesa me të sotmen, jonjerëzorja me njerëzoren.

Mbi të gjitha, flamuri amerikan kudo si shenjë e mbijetesës se Amerika dhe bota civilizuese nuk zbrapsen para qëllimeve dashakeqe të forcave të errëta, të cilat janë kundër lirisë.

Rrëfimi i të birit të një zjarrfikësi amerikan, rrënqethës e frymëzues, njëkohësisht. Ata që janë reaguesit e parë, të parët e panë tmerrin, të parët e ndjenë dhimbjen e disa nga ta u bën pjesë e dhimbjes.

Jetë njerëzish u shuan nga sulmi terrorist, në mesin e të cilëve edhe tre shqiptarë. Mon Gjonbalaj nuk arriti ta gëzoj pensionimin. Të njëjtën ditë në vend të pensionit fitoi përjetësinë.

Sot nderova kujtimin për viktimat e sulmit terrorist të 11 shtatorit 2001. Jemi në krah të popullit amerikan, sikurse çdo herë dhe partnerë të vendosur kundër terrorizmit dhe çfarëdo forme që cenon lirinë e të tjerëve. Amerika është personifikim i lirisë, ndaj në mbrojtje të saj jemi gjithnjë bashkë!