Presidenti i Republikës së Kosovës, Hashim Thaçi, ka pranuar letrat kredenciale nga ambasadori i ri jorezident i Emirateve të Bashkuara Arabe për Republikën e Kosovës,  Abdulasam Hareb Obaid Al Romaithi.

Me këtë rast kreu i shtetit ka uruar ambasadorin, Abdulasam Hareb Obaid Al Romaithi për detyrën e re.

“Urime për postin e ri. Raportet tona janë të shkëlqyeshme. Falënderojmë angazhimin e pakursyer të Emirateve për njohjen dhe shtetndërtimin në Kosovë”, ka theksuar Thaçi.

Presidenti Thaçi ka thënë se Emiratet kanë bërë shumë edhe në shtimin e njohjeve për Kosovën. “Për këtë do të jemi mirënjohës”, ka thënë ai.

Thaçi ka theksuar se raportet e mira duhet t’i zgjerojmë edhe në fushën e ekonomisë, ku duhet të kemi më shumë shkëmbime tregtare.

Ndërsa, ambasadori Abdulasam Hareb Obaid Al Romaithi, duke uruar presidentin Thaçi me rastin e 10- vjetorit të pavarësisë, ka thënë se Emiratet e Bashkuara Arabe do të vazhdojnë mbështetjen për Republikën e Kosovës.

“Emiratet do të qëndrojnë përkrah popullit të Kosovës dhe do të vazhdojnë të mbështesin Kosovën në të gjitha fushat”, është shprehur ambasadori Abdulasam Hareb Obaid Al Romaithi.