Presidenti amerikan Donald Trump ka anuluar dërgimin e Steve Witkoff dhe Jared Kushner në Pakistan për bisedime me Iranin, duke deklaruar se nuk ka kuptim të bëhen udhëtime të gjata pa rezultate konkrete.

Sipas tij, Shtetet e Bashkuara “i kanë të gjitha kartat në dorë” dhe Irani mund të kontaktojë kur të dëshirojë.

Delegacioni amerikan ishte larguar më herët nga Islamabadi pas takimeve me zyrtarët pakistanezë, ndërsa ministri i Jashtëm iranian, Abbas Araghchi, u largua pa pritur palën amerikane.

Bisedimet kanë përfshirë edhe çështje të ndjeshme si programi bërthamor i Iranit dhe tensionet në rajon, ndërsa Teherani vazhdon të shprehë skepticizëm ndaj SHBA-së dhe të mbajë qëndrim të ashpër në negociata.