Presidenti i ShBA-së, Donald Trump, e ka paralajmëruar Francën se do të vendosë një tarifë prej 100% mbi importet e verës franceze nëse Parisi nuk e shfuqizon taksën që u vendos kompanive të mëdha të teknologjisë.

Sipas një raporti të New York Post, kërcënimi u bë përpara samitit të G7 në Francë, duke intensifikuar tensionet tregtare ekzistuese midis Uashingtonit dhe Parisit.

E ashtuquajtura “taksë digjitale” e Francës synon kryesisht gjigantët e mëdhenj amerikanë të teknologjisë, siç janë kompanitë në sektorët e shërbimeve online, reklamimit dhe tregtisë elektronike. Uashingtoni ka argumentuar për vite me radhë se masa ndikon në mënyrë disproporcionale në bizneset amerikane.

Në një intervistë me New York Post, Trump tha se e paralajmëroi Presidentin Francez Emmanuel Macron se Franca do të përballet me tarifa të rënda tregtare nëse do të vazhdojë taksën digjitale që u vendos kompanive amerikane të teknologjisë.

“I kërkova të mos i vërë taksa kompanive amerikane dhe, nëse e bën këtë, nuk do të kem zgjidhje tjetër veçse të vendos një tarifë 100% për të gjithë shampanjën dhe të gjitha verërat që vijnë nga Franca ”, tha Trump.

Presidenti amerikan shtoi se zgjidhja qëndron vetëm në duart e Parisit: E tëra çfarë duhet të bëjë Macron është të heqë këtë taksë mbi shitjet dhe ai nuk do të përballet me këtë lloj presioni.

Deklaratat janë kërcënimi më i qartë i Trump deri më tani për hakmarrje tregtare kundër Francës dhe janë pjesë e kundërshtimit të hershëm të Uashingtonit ndaj taksave digjitale evropiane, të cilat Shtetet e Bashkuara i shohin si masa që godasin në mënyrë disproporcionale gjigantët amerikanë të teknologjisë.

Ky qëndrim pritet të errësojë kontaktet midis dy udhëheqësve në margjinat e samitit të G7 në Francë, pasi i shtohet mosmarrëveshjeve tashmë ekzistuese mbi tregtinë, taksimin e shumëkombësheve dhe menaxhimin e çekuilibrave ekonomike globale.