Turqia nis operacionin ushtarak në verilindje të Sirisë

09 tetor 16:54

Turqia dhe aleatët e tij rebelë sirianë kanë nisur operacionin e tyre ushtarak në verilindje të Sirisë, ka thënë presidenti turk, Rexhep Taip Erdogan.

Sipas tij kjo ofensivë synon të eliminojë “korridorin e terrorit” përgjatë kufirit jugor të Turqisë.

Erdogani ka thënë se ofensiva e ashtuquajtur “Operacioni Pranvera e Paqes”, ka për qëllim eliminimin e kërcënimit që vjen nga milicia e kurdëve sirianë dhe militantëve të grupit ekstremist, Shteti Islamik.

Milicia kurde, e njohur si grupi YPG ka luajtur rol të rëndësishëm në mposhtjen e Shtetit Islamik në Siri.

Turqia e konsideron këtë grup si pjesë të Partisë së ndaluar të Punëtorëve të Kurdistanit, e cila ka luftuar për autonominë kurde brenda Turqisë për tri dekada me radhë.

YPG-ja e mohon çdo lidhje të drejtpërdrejtë organizative me Partinë e Punëtorëve të Kurdistanit.

Erdogani ka thënë se kjo ofensivë synon edhe të mundësojë kthimin e refugjatëve sirianë pas formimit “të zonave të sigurta” në këtë pjesë.

“Misioni ynë është që të parandalojnë krijimin e një korridori të terrorit përgjatë kurfirit jugor, si dhe të ofrojmë paqe në këtë zonë”.

“Ne do ta ruajmë integritetin territorial të Sirisë dhe të çlirojmë komunitetet lokale nga terroristët”, ka shkruar Erdogani në llogarinë e vet në “Twitter”.

Të hënën forcat amerikane kanë nisur të tërhiqen nga zonat përgjatë kufirit të Sirisë me Turqinë, pasi Shtëpia e Bardhë ka njoftuar se do të distancohet nga operacioni i planifikuar turk kundër forcave kurde në verilindje të Sirisë.

Sipas disa njoftimeve, forcat amerikane janë tërhequr tashmë nga dy postblloqet e vëzhgimit në Tel Abjad dhe Ras al-Ain.

Lajme të sponsorizuara

Të fundit
Sot (e mërkurë) nga ora 18:00 do të zhvillohet ndeshja…