Ukraina ka ofruar të furnizojë Gjermaninë me energjinë e saj të tepërt, ndërsa ajo përpiqet t’i japë fund varësisë së saj nga importet ruse të energjisë.

Kryeministri Denys Shmyhal i tha agjencisë gjermane të lajmeve Dpa se Ukraina aktualisht eksporton energjinë e saj në Moldavi, Rumani, Sllovaki dhe Poloni, por është e gatshme të zgjerojë eksportet në Gjermani.

“Ne kemi një sasi të mjaftueshme të energjisë elektrike në Ukrainë falë termocentraleve tona bërthamore”, tha Shmyhal, duke shtuar se ai do ta ngrinte çështjen gjatë vizitës së tij në kryeqytetin gjerman fundjavën e ardhshme.

Ai shtoi se një marrëveshje për energjinë do të ishte e dobishme për të dyja palët. “BE do të merrte më shumë energji dhe ne do të merrnim valutën e huaj që na nevojitet urgjentisht”, tha kryeministri.