Në një video të postuar nga një ushtar rus në Avdiivka shihet sesi i referohet me emër dikujt “Larisa”, derisa ecën nëpër rrënojat e këtij qyteti ukrainas, shkruan Newsweek.

“Larisa, të dua! Jam në Avdiivka. Shiko…, këto janë pamjet nga Avdiivka. Nëse nuk më beson, shiko, jam në Avdiivka”, thotë ushtari rus, transmeton Telegrafi.

“Shiko si është shkatërruar gjithçka këtu. Ta shikojmë më afër. Po eci Larisa, jam në Avdiivka. Askush nuk më besoi që kam ardhur këtu. Jam vullnetar. Larisa, të dua! Larisa, ka gjithçka në këto shtëpi. Ka televizorë dhe gjithçka. Thjesht na duhet një veturë që t’i marrim të gjitha nga këtu”, thotë ushtari rus, një dëshmi tjetër që Kremlini ka dërguar njerëz enkas për vjedhje të pronës së ukrainasve.

Avdiivka para luftës kishte 32 mijë banorë dhe së fundmi ka rënë në kontrollin e rusëve. Në betejën për këtë rajon rusët e paguan me një kosto të lartë, ku ushtarët e Putinit akuzuan eprorët e tyre se i dërguan si mish për top.

Presidenti ukrainas Volodymyr Zelensky pati thënë se vendimi për t’u tërhequr nga Avdiivka ishte marrë për ta shpëtuar jetën e ushtarëve të tij.