Muaji qershor është dhënë si afat optimal për mbajtjen e zgjedhjeve të reja në Kosovë nga kryeministri në detyrë, Albin Kurti, por tashmë afatet ligjore e pamundësojnë një gjë të tillë.

Përkundër kësaj, në Lëvizje Vetëvendosje kanë këmbëngulur se qytetarët duhet të dalin në zgjedhje brenda 45 ditëve pas vendimit të Gjykatës Kushtetuese, pasi siç kanë thënë ata vendimi i kësaj gjykate në lidhje me dekretin e presidentit do të jetë në favor të tyre.

Ndërsa mbajtjen e zgjedhjeve të reja janë duke e kundërshtuar dy partitë që janë duke pretenduar për formimin e qeverisë, LDK-ja dhe AAK-ja.

Në anën tjetër, njohësit e sistemit zgjedhor e japin muajin korrik si mundësi për zgjedhje të reja, nëse Kushtetuesja e rrëzon dekretin e presidentit Hashim Thaçi për mandatarin.

Anëtarja e kryesisë së Lëvizjes Vetëvendosje, Albulena Haxhiu për “Kosovapress”, ka thënë se zgjedhjet duhet të mbahen sa më parë pas kalimit të rrezikut nga pandemia Covid-19.

“Ne e kemi përmendur si muajin më të përshtatshëm muajin qershor, por kjo nuk mundet të ndodhë për faktin se sipas legjislacionit të kushtetues, zgjedhjet e jashtëzakonshme nuk mund të mbahen më herët se 30 ditë dhe më vonë se 45 ditë. Në këtë drejtim kemi thënë se duhet të mbahen sa më parë që është e mundshme pas rrezikut nga pandemia Covid 19”, ka thënë Haxhiu.

Kundër zgjedhjeve të reja është shprehur nënkryetari i LDK-së, Lutfi Haziri. Sipas tij, mbajtja e zgjedhjeve në këtë kohë është luks.

“Duke pasur parasysh mos realizimin e rekomandimeve të BE-së për sistemin zgjedhor, duke pasur parasysh pandeminë, duke pasur parasysh gjendjen sociale që është duke rënduar në kohë pandemie. Efekti i pandemisë në ekonomi, kosto buxhetore të zgjedhjeve, është tepër luksoze me kërkuar, me dalë njerëzit në zgjedhje të një lideri apo partie politike”, ka thënë Haziri për “Kosovapress”.

Në linjë të njëjtë me Hazirin është shprehur edhe nënkryetari i AAK-së, Ardian Gjini, partitë e të cilëve  janë duke pritur ta formojnë  qeverinë e ardhshme. Gjini ka thënë se përbërja aktuale e Kuvendit duhet ta qojë mandatin deri në fund.

“Se kur mund të mbahen zgjedhjet është diçka për të cilën kishim me biseduar, nëse ishim në situata tjera. Në rrethana normale edhe duhet të vendosim se kur e shpërbëjmë Kuvendin dhe se kur po i mbajmë zgjedhjet. Tani zgjedhjet munden me ardhur me automatizëm ose munden me ndodhë me ndonjë shpërndarje të Kuvendit, mirëpo nuk mundem me e ditë unë, Kuvendit duhet me e qu mandatin deri në fund të paktën një herë”, ka thënë ai.

E drejtori i IKD-së, Ehat Miftaraj,. ka thënë afati prej 45 ditësh nëse Kushtetuesja e rrëzon dekretin e presidentit Hashim Thaçit, do të ishte optimal për mbajtjen e zgjedhjeve.

“Nëse Gjykata Kushtetuese potencialisht merr një vendim që Kosova duhet të shkojë në zgjedhje, atëherë afati prej 45 ditëve është afati që e përcakton Kushtetuta dhe ligji. Këtu nuk mund të themi që është në kuadër të vullnetit të presidentit apo dikujt tjetër. Nënkupton se momentin kur kemi një aktgjykim të Gjykatës Kushtetuese, atëherë automatikisht vihet në zbatim afati prej 45 ditëve. Në këtë rast, duke marrë për bazë që kemi të bëjmë me organizimin e zgjedhjeve të përgjithshme, mendojë që ky afat do të ishte afat optimal se kur do të ishte dita se kur do të mbaheshin zgjedhjet”, ka thënë ai.

Se Kosova nuk mund të shkojë në zgjedhje në muajin qershor, siç ka pretenduar kryeministri Kurti, e ka thënë analisti politik, Rasim Aliaj.

“Muajin qershor e kemi humbur me afate kushtetuese. Nuk ka gjasë që muaji qershor të jetë muaji i zgjedhjeve në Kosovë. Pavarësisht që Serbia dhe Maqedonia i kanë zgjedhjet në qershor, por që të dyja kanë pasur data paraprakisht që i kanë shtyrë shkaku i pandemisë”,  ka thënë Aliaj.

Zgjedhjet e fundit parlamentare, Kosova i ka mbajtur më 6 tetori të vitit të kaluar. Pas rrëzimit të qeverisë Kurti, Kuvendi i Kosovës nuk është shpërndarë, pasi presidenti Hashim Thaçi ka dekretuar për kryeministër Avdullah Hotin nga LDK-ja. Ky dekret po kontestohet në Gjykatën Kushtetuese nga LV-ja. Gjykata Kushtetuese pritet që deri më 29 maj ta thotë fjalën e saj nëse dekreti i Thaçit është kushtetues.