Presidenti i Ukrainës, Volodymyr Zelensky, ka thënë se ka biseduar me presidenten e Komisionit Evropian, Ursula von der Leyen, për përparimin e Ukrainës drejt integrimit në Bashkimin Evropian, për dërgesat evropiane të municioneve për ushtrinë ukrainase, si dhe për sanksionet e reja kundër Rusisë.

Von der Leyen ka mbërritur në Kiev, pasi Rusia, gjatë natës, nisi një tjetër sulm me raketa në kryeqytetin ukrainas – të pestin me radhë që nga fillimi i këtij muaji, raporton “Rel”.

Zelensky ka thënë se ushtria ukrainase ka nevojë për dërgesa më të shpejta të predhave të artilerisë nga BE-ja.

Ai, gjithashtu, ka kritikuar kufizimet që disa vende të BE-së kanë vendosur mbi eksportet e grurit nga Ukraina, duke thënë se këto masa shkojnë në avantazh të Rusisë.

Zelensky dhe von der Leyen kanë folur edhe për një paketë të re sanksionesh kundër Rusisë, që BE-ja po përgatit, si dhe për përparimin e Kievit në negociatat e anëtarësimit në BE.

Vizita e von der Leyenit,  e pesta që nga fillimi i pushtimit të Ukrainës nga Rusia, në shkurt të vitit 2022 – u zhvillua në ditën kur Bashkimi Evropian festoi Ditën e Evropës.

Kjo ditë nderon Deklaratën e Schumanit, të paraqitur nga ministri i Jashtëm francez, Robert Schuman, më 9 maj të vitit 1950.

Deklarata shihet si gur themeli i asaj që do të bëhej BE-ja e sotme, me 27 vende anëtare.

“Sa mirë të jem sërish në Kiev. Aty ku vlerat që i mbajmë afër, mbrohen çdo ditë”.

“Unë e mirëpres vendimin e presidentit Zelensky për ta shënuar 9 Majin – Ditën e Evropës – edhe këtu në Ukrainë”, ka shkruar  von der Leyen në “Twitter”.

Good to be back in Kyiv.

Where the values we hold dear are defended everyday.

So it is such a fitting place to celebrate the day of Europe.

I welcome President @ZelenskyyUa's decision to make 9 May Europe Day also here in Ukraine. pic.twitter.com/MEGOEfgyIq

— Ursula von der Leyen (@vonderleyen) May 9, 2023

Zyrtarja e lartë evropiane ka arritur në Kiev disa orë pasi Rusia lëshoi 25 raketa në Ukrainë – 15 prej të cilave kishin në shënjestër kryeqytetin.

“Gjatë dy valëve të sulmeve në Ukrainë natën e 9 majit, pushtuesit rusë lëshuan 25 raketa – 23 prej tyre u shkatërruan nga mbrojtja ajrore e Ukrainës”, ka thënë përmes një deklarate Shtabi i Përgjithshëm i Ushtrisë së Ukrainës.

Më herët, kreu i administratës ushtarake të kryeqytetit, Serhiy Popko, ka thënë se mbrojtja ajrore e Kievit zbuloi dhe shkatërroi rreth 15 raketa mbi qytet.

Popko ka thënë se nuk ka raporte për dëme apo viktima.

Sulmi në Kiev ishte i dyti brenda disa orësh, pasi një ditë më herët Rusia lëshoi 35 dronë vetëshkatërrues dhe 16 raketa.

Sulmet me raketa kishin në shënjestër rajonet e Harkivit, Hersonit, Mikollajivit dhe Odesës dhe shkaktuan viktima në njerëz.

“Për fat të keq, ka civilë të vdekur dhe të plagosur, dhe ndërtesa të larta të dëmtuara, ashtu si edhe shtëpi private dhe infrastruktura të tjera”, ka thënë Shtabi i Përgjithshëm i Ushtrisë së Ukrainës.

Kryebashkiaku i Kievit, Vitali Klitschko, ka thënë më herët se pesë persona u plagosën gjatë natës më 8 maj, si rezultat i një sulmi me dron, që dëmtoi ndërtesat dhe infrastrukturën.

Në të njëjtën ditë, Zelensky ka shënuar përvjetorin e përfundimit të Luftës së Dytë Botërore në Evropë, duke thënë se vendi i tij do të dalë fitimtar përballë Rusisë.

Zelensky ka paraqitiur një projektligj në Parlament, që shënon zyrtarisht 9 Majin si Dita e Evropës në Ukrainë, ndërsa Dita e Fitores, 8 Maji, do të festohet si “ditë kujtimi dhe fitoreje mbi nazizmin”.

Rusia dhe ish-republikat e tjera sovjetike e festojnë fundin e Luftës së Dytë Botërore më 9 maj, ndërsa Evropa e feston atë një ditë më herët.

Zelensky ka thënë përmes një video-mesazhi se forcat ruse që pushtuan vendin e tij, do të mposhten me ndihmën e aleatëve perëndimorë, ashtu sikurse Gjermania naziste që u mund në Luftën e Dytë Botërore.