Për numrin e madh të rasteve me Covid-19 në komunën e Prishtinës, ministri i Shëndetësisë, Armend Zemaj, ka fajësuar Lëvizjen Vetëvendosje.

Zemaj nga foltorja e Kuvendit është shprehur se nga tubimi i 12 qershorit të cilin e pati organizuar Vetëvendosje, në kryeqytet janë rritur frikshëm rastet me Covid-19.

Ai ka thënë se në total në Prishtinë janë 1 mijë e 75 raste aktive me Covid-19.

“Covid-19 iu prekë dhe juve dhe këtë është dashur që ta keni parasysh edhe me datë 12 qershor. Po ju tregoj se çka ka ba Covid pas datës 10 qershor. Total i kemi 1 075 raste në Prishtinë. Të shëruar janë 284, 10 të vdekur, dhe 826 janë aktiv. Kjo është papërgjegjësi e juaja që i keni nxjerrë ata njerëz, nuk e keni respektuar distancën. Kjo është përgjegjësi morale e të gjithë juve”, ka thënë Zemaj.

Më tutje, Zemaj është deklaruar edhe për vdekjet e dyshimta që kanë ndodhur  në Klinikën Infektive gjatë ditës së shtunë dhe të diel të javës që e lamë pas.

“Kualifikimi deri në vrasje është papërgjegjësi totale. Fyerje për familjet dhe pafytyrësi politike e adresimit të një qasje të tillë. Mjekimi intenziv në Infektivë furnizohet me oksigjen nga sistemi qendror, me të cilin furnizohen me oksigjen edhe disa klinika të tjera. Me të cilat sipas Inspektorati Shëndetësor nuk ka vërejtje për furnizim apo ndalje të oksigjenit”, ka thënë Zemaj.