Ditët kalojnë, por ende nuk ka asnjë lajm për Floresha Prengun, 35-vjeçaren shqiptare që jeton në Trento të Italisë prej vitesh. Këtë të mërkurë u mbush saktësisht një javë që kur nëna e dy vajzave është zhdukur.

Më 22 tetor, gruaja ishte larguar nga shtëpia herët në mëngjes për të shkuar në punë, por pasdite nuk u kthye në shtëpinë ku jeton me bashkëshortin dhe dy vajzat. Anëtarët e familjes ngritën menjëherë alarmin për zhdukjen e saj dhe nisën kërkime në qytet.

Kërkime u kryen edhe përgjatë lumit Adige, me ndërhyrjen e Njësisë së Shpëtimit në Lumë të Departamentit të Zjarrfikësve të Trentos. Rezultatet e këtij kërkimi, si dhe ato që pasuan në ditët në vijim nuk patën asnjë rezultat.

Dhjetëra zjarrfikës, përfshirë edhe patrullat e lumit, kontrolluan zonën për rreth 15 kilometra, nga Trento në jug. Një helikopter fluturoi mbi zonë, duke monitoruar situatën nga lart, por asgjë. Deri tani nuk ka pasur asnjë shenjë të Floreshës.

Të afërmit vazhdojnë të mos kenë asnjë lajm dhe familja, veçanërisht dy vajzat e saj, janë jashtëzakonisht të shqetësuara. Një qarkore për zhdukjen e saj është dërguar në të gjitha prefekturat italiane. Një apel u është bërë edhe qytetarëve që të njoftojnë nëse kanë informacione.

“Po kërkojmë ndihmën tuaj për të gjetur Floresha Prengu. Ajo është një nënë e re e dy vajzave. Kushdo që e sheh ose di diçka për të, kërkohet të kontaktojë menjëherë forcat e rendit. Nëse keni ndonjë informacion, ju lutemi telefononi në 112”, –u shprehën anëtarët e familjes në një apel, duke postuar njoftimin, së bashku me fotot, në mediat sociale në shqip.

Gruaja ka jetuar në Trento me familjen e saj për 3 vitet e fundit dhe ka punuar si pastruese në pallate. Ajo ishte shumë e lidhur me vajzat e saj dhe kohët e fundit kishte vuajtur shumë nga vdekja e babait të saj. Burri i saj po përpiqet të përballet me humbjen e tij dhe madje mund t’i drejtohet programit të RAI-t, “Kush e ka parë?” për të kërkuar ndihmë drejtpërdrejt në TV.

“Ai është i tronditur dhe i dëshpëruar”, – thonë ata që e njohin. Komuniteti shqiptar është mbledhur rreth bashkëshortit dhe vajzave të Floresha Prengut orët e fundit, duke u ofruar atyre ndihmë për çdo nevojë apo shqetësim. Të gjithë shpresojnë që ata të mund të ribashkohen së shpejti me gruan dhe nënën e tyre. /Përgatiti Lapsi.al