Festivali “Sunny Hill” mbylli maratonën e tij 72 orëshe pa regjistruar incidente gjatë ecurisë së tij.

Por, kritika e opozitës dhe shumë përdoruesve në media sociale u përqendrua te pasqyrimi i yllit komunist përbri shqiponjës në flamurin kombëtar.

Fotografia u shfaq në ekranin e madh të skenës së “Sunny Hill”, gjatë performancës së grupit “Asgjë Sikur Dielli”.

Këta të fundit, ishin të pestët që u ngjitën në skenë të dielën e 28 gushtit.

Deputetët demokratë reaguan fill pas publikimit të fotove në mediat sociale, duke e cilësuar si një ngjarje “jo të rastësishme”.

Kjo, në një vend që “ka vuajtur gjatë nën diktaturën e instaluar nga komunistët”.

Ishte deputeti Enkelejd Alibeaj që kërkoi më shumë seriozitet dhe respekt për procesin e dekomunistizimit.

Pas zhurmës së krijuar rreth e qark kësaj fotoje, reagoi edhe vokalisti i grupit Alban Nimani.

Sipas tij, video-klipi i këngës “Ku ka më mirë se me qenë shqiptar?” është publikuar në vitin 2005.

Ajo është një parodi e stilit “Monty Python”, ku trajtohen ngjarjet dhe figurat historike nga antikiteti deri në ditët e sotme, në mënyrë surrealiste dhe ironike.

“Shfaqja e flamurit kombëtar me yll, nuk ka të bëjë me glorifikimin e komunizmit, përkundrazi, në video klip shembet komunizmi”, vëren Nimani.

Këngëtari garantoi se grupi mbetet shumë i vetëdijshëm për persekutimet, krimet dhe vuajtjen që ka shkaktuar komunizmi në Shqipëri, sepse i përkasin familjeve të persekutuara.

Kryebashkiaku i Tiranës, Erion Veliaj deklaroi sakaq se nuk luftohet komunizmi me metoda komuniste.

Kjo, pasi kënga ishte “një satire ndaj regjimit”

“Uroj të luftoni me të njëjtin zell sekretarin e PPSH në krye të PD dhe sigurimsin aleat!”, thekson Veliaj.

Në fund të ditës, zhvillimi krijoi “shumë zhurmë për ‘asgjë’ sikur diellin”.