Albian Hajdari ka nënshkruar një kontratë të re afatgjatë me TSG Hoffenheim.

Klubi i Bundesligës ka konfirmuar zgjatjen e kontratës për mbrojtësin zviceran të premten, pa zbuluar kohëzgjatjen e marrëveshjes.

“Albian u bashkua me ne menjëherë pas fillimit të sezonit të kaluar verën e kaluar dhe është zhvilluar në një lojtar kyç dhe titullar të rregullt në një kohë shumë të shkurtër”.

“Që nga dita e parë, ai u identifikua plotësisht me projektin tonë në TSG dhe, përmes performancave të tij, ka dhënë një kontribut të madh në sezonin tonë të suksesshëm. Vetëm 22 vjeç, ai ende ka potencial të konsiderueshëm zhvillimi. Këmba e tij e fortë e majtë, shkathtësia mbrojtëse dhe mentaliteti i shkëlqyer janë cilësitë e tij përcaktuese”, ka thënë drejtori menaxhues sportiv i TSG Hoffenheim, Andreas Schicker.

Hajdari, i cili i cili i është bashkuar Hoffenheimit nga skuadra elitare zvicerane FC Lugano verën e kaluar,  ka thënë se ndihet rehat në klubin gjerman.

“Ndihem shumë rehat në Hoffenheim. Edhe kur u bashkova gjatë verës, e kuptova shpejt se diçka e veçantë po ndërtohet këtu. Perspektiva është e duhura dhe dua të vazhdoj të luaj rolin tim në këtë zhvillim pozitiv dhe në suksesin e Hoffenheimit”, ka thënë Hajdari.