>

Veseli për mediet kroate: Serbia duhet ta njohë Kosovën

11 shkurt 11:51

Kryetari i Kuvendit të Kosovës, Kadri Veseli, ka dhënë një intervistë për agjencinë kroate të lajmeve, “HINA”, gjatë vizitës zyrtare në Kroaci, ku ka folur për dialogun me Serbinë, Gjykatën Speciale, ushtrinë dhe vrasjen e Oliver Ivanoviqit.

Gjatë kësaj interviste i pari i Kuvendit është pyetur nga gazetarët kroatë, për mundësinë që Specialja t’i akuzojë ish-komandantët e UÇK-së që tani janë liderët e Kosovës.

“Ne e dimë se kush ishte agresori dhe kush viktima. Por Kosova do të përmbushë të gjitha detyrimet e saj ndërkombëtare. Realisht me themelimin e kësaj gjykate ne kemi dëshmuar gatishmërinë tonë për të punuar në këtë drejtim”, ka qenë përgjigja e Veselit.

Më tutje, Veseli ka thënë që Kosova dhe Serbia duhet të nënshkruajnë një marrëveshje ligjërisht të detyrueshme, pasi është një kusht për integrimin evropian të dyja vendeve, që është përcaktuar edhe nga Strategjia e BE-së për zgjerim.

“Nuk është e arsyeshme që politikanët e moderuar në Serbi të mos jenë në gjendje ta njohin realitetin dhe pavarësinë e Kosovës. Por çfarë duhet të bëjmë, është që të lëvizim larg konflikteve me fqinjët”, ka deklaruar Veseli.

Duke folur për dialogun në Bruksel, Veseli është zotuar edhe për formimin e bashkësisë së komunave me shumicë serbe.

“Dhe ne kemi vështirësitë tona por jemi të gatshëm për t’i kapërcyer. E respektojmë Serbinë si shtet sovran, dhe jemi të vendosur që qytetarët tonë të çdo komuniteti të jenë të integruar në çdo kuptim”, ka thënë Veseli.

Kryeparlamentari Veseli në këtë intervistë ka folur edhe për ushtrinë. Sipas tij formimi i ushtrisë për një shtet të pavarur është i pashmangshëm. “Kosova është shtet i pavarur dhe sovran, dhe transformimi në forcat e armatosura është proces i pashmangshëm”, ka thënë Veseli.

Ai pohuar se ushtria e Kosovës nuk do të jetë kërcënim për askënd, dhe do të kontribuojë në stabilitetin e gjithë Kosovës.
Veseli ka thënë se të gjitha veprimet do të merren në koordinim me mbështetjen e Amerikës dhe të NATO-s.

Krejt në fund, Kadri Veseli, ka thënë se vrasja e politikanit serb, Oliver Ivanvoiq ishte “llogari e brendshme serbe”.

“Ky ishte një akt kriminal kundër stabilitetit të Kosovës, pavarësisht se kush e ka kryer. Kjo është hera e parë që situata shkakton terror psikologjik të serbëve. Unë nuk paragjykoj se kush është përgjegjës, por kjo nuk është në interes të shqiptarëve dhe serbëve”, ka thënë Veseli. Ai ka premtuar se Kosova do t’i sjellë para drejtësisë kryesit e kësaj vepre. (RTK)

Lajme të sponsorizuara

Të fundit
Të fundit
Heinz-Christian Strache, lideri i partisë djathtiste Partia e Lirisë dhe…