Nga një shpërthim në një xhami në lindje të provincës afgane Khost, ka lënë të vdekur të paktën dhjetë persona dhe plagosur 30 të tjerë, kanë thënë zyrtarët e Afganistanit.

Bomba ishte vendosur në një tendë që përdorej si qendër për regjistrimin e votuesve. Kjo tendë ishte e vendosur në oborrin e një xhamie, ka thënë për “AFP”-në shefi i policisë në Khost, Abdul Hanan Zadran.

Abdul Wali Wahidzai, anëtar i këshillit provincial, ka thënë se numri i viktimave mund të rritet.

Askush deri më tani nuk e ka marrë përgjegjësinë për këtë sulm.

Muajin e kaluar, nga një sulm me bombë jashtë një qendre për regjistrimin e votuesve në Kabul, u patën vrarë të paktën 57 persona.

Grupi militant, Shteti Islamik e kishte marrë përgjegjësinë për këtë sulm.

Afganistani po përgatitet për zgjedhjet parlamentare, që pritet të mbahen më vonë gjatë këtij viti.