Numri i viktimave nga cikloni “Idai” që ka përfshirë Afrikën jugore më shumë se një javë më parë, ka shënuar rritje, kanë thënë autoritetet vendore, raporton “BBC”.

Numri i personave të raportuar të vdekur në Mozambik është rritur nga 242 në 417.

Ndërsa, numri total i viktimave në Mozambik, Zimbabve dhe Malavi, ka arritur në 700. Kjo shifër pritet të rritet edhe më shumë.

Kombet e Bashkuara kanë deklaruar se do të mund të paraqesin shifrën e saktë vetëm kur të qetësohet vërshimi i ujërave.

Zyra e OKB-së për Koordinim dhe Çështje Humanitare, ka theksuar se lumenjtë janë në rrezik të daljes nga shtrati sërish.

Mijëra persona kanë mbetur të ngujuar nga vërshimi i lumenjve, derisa po bëhet përpjekje për të siguruar ndihma ushqimore.

Rreth 1.7 milion persona është thënë se janë pa energji elektrike si dhe kanë pësuar dëme të mëdha.