Shtetet e Bashkuara të Amerikës (ShBA) kanë raportuar të paktën 2 mijë e 463 raste të varianteve të koronavirusit që janë parë për herë të parë në Mbretërinë e Bashkuar, Afrikën e Jugut dhe Brazil.

Lajmin e ka bërë me dije Qendra e ShBA-së për Kontrollin dhe Parandalimin e Sëmundjeve (CDC), raporton “CNN”.

CDC-ja ka paralajmëruar se këto shifra nuk përfaqësojnë numrin e përgjithshëm të rasteve të tilla që qarkullojnë në të gjithë vendin, vetëm ato që janë zbuluar duke analizuar mostrat pozitive.

Varianti i Mbretërisë së Bashkuar:

Shumica dërrmuese e këtyre rasteve, 2 mijë e 400, janë varianti më ngjitës i njohur si B.1.1.7, i cili është zbuluar fillimisht në Mbretërinë e Bashkuar.

Ky variant është gjetur në 44 shtete, Porto Riko dhe Uashington, DC. Rreth një e katërta janë në Florida.

Varianti i Afrikës së Jugut:

Ka 53 raste të variantit B.1.351, parë për herë të parë në Afrikën e Jugut, raportuar në 15 shtete dhe Uashington, DC.

Varianti i Brazilit:

Së fundmi, 10 raste të variantit P.1 të lidhur së pari me brazilin janë zbuluar në pesë shtete të ShBA.