Besimtarët myslimanë në Kosovë, këtë javë kanë nisur muajin e shenjtë të Ramazanit, nën masat anti-Covid.

Ata që mbajnë Ramazanin për një muaj do të qëndrojnë pa ngrënë e pa pirë nga agimi deri në përmendim të diellit.

Njerëzit zakonisht  bëjnë iftar me anëtarët e familjes dhe miqtë.

Por, në Pozheran të Vitisë mbrëmë ka ndodhur një ngjarje e pazakontë, sipas banorëve.

Raportohet se besimtarët atje kanë bërë iftar pesë minuta para kohës së caktuar, pasi ezani ishte thirrur gabimisht më herët.

Atje nga xhamia e këtij fshati, muezini e ka thirr ezanin e iftarit në orën 19:19 minuta, pesë minuta para kohës së caktuar për iftarit, në ditën e mërkurë që ishte saktë në orën 19:24, sipas vaktisë së Ramazanit për territorin e Kosovës nga Bashkësia Islame e Kosovës.

“Plus Televizion” ka kontaktuar imamin e Xhamisë në Pozheran, Muhamet Zuka, i cili ka konfirmuar se kjo ka ndodhur gabimisht.

“Po është thirr ezani pesë minuta më herët gabimisht. Muezini e ka pas orën gabim, menjëherë posa kam dëgjuar ezanin e kam thirr muezinin duke i thënë se është para kohe pak dhe është përmirësuar. Ata që kanë bërë iftar në ato momente nuk e kanë prishë agjërimin pasi asgjë nuk ka qenë qëllimisht”, ka thënë Zuka.

Sipas traditës islame, sapo muezini të fillojë ta thërras Ezanin, atëherë mund të bëhet iftar.