Deputetja e zgjedhur e Aleancës, Albana Bytyqi, ka komentuar deklaratat e djeshme të Lëvizjes Vetëvendosje, e cila ka thënë se i ka votat për formimin e qeverisë dhe zgjedhjen e kryetarit të Kuvendit, por se kërkon konsensus për zgjedhjen e presidentit.

Sipas Bytyqit, një qasje e tillë e LV-së e ka çuar vendin në zgjedhje edhe në dhjetor, për shkak të mungesës së një marrëveshjeje politike që do ta përfshinte edhe çështjen e presidentit.

“Kjo qasje është shumë e gabuar, sepse po shkon pikërisht si në muajin dhjetor, kur shkuam në zgjedhje me këtë logjikë se fillimisht formohen institucionet, zgjidhet Qeveria e më pas presidenti. Kjo ka qenë një procedurë jo e rregullt. Edhe tani, nëse vazhdon kjo qasje e LV-së, vendi do të shkojë sërish në zgjedhje. Prandaj, paraprakisht duhet të arrihet një marrëveshje politike. Mirëpo, të gjithë e dimë se partia e parë fituese është dashur t’i nisë me kohë negociatat për zgjedhjen e presidentit, në mënyrë që të mos vijë dita e fundit kur nuk mund të gjendet asnjë zgjidhje dhe vendi të shkojë sërish në zgjedhje. Nuk shohim ndonjë rezultat pozitiv”, ka deklaruar Bytyqi për “RTV21”.