Manchester City nuk ka ndërmend të heqë dorë lehtë nga Rodri, pavarësisht interesimit të Real Madridit për mesfushorin spanjoll.

Sipas raportimit të Sky Sports Deutschland, kampioni anglez i ka vendosur çmimin prej 75 milionë eurosh fituesit të “Topit të Artë”, duke qëndruar i palëkundur në vlerësimin e tij për lojtarin.

Në anën tjetër, raportimet bëjnë të ditur se edhe vetë Rodri është i interesuar për një transferim te Real Madridi, çka mund t’u japë shtysë negociatave mes dy klubeve gjatë javëve të ardhshme.

Klubi madrilen vazhdon të kërkojë përforcime në mesfushë dhe e sheh Rodrin si një nga objektivat kryesorë për sezonin e ri. Megjithatë, Manchester City nuk dëshiron ta humbasë një prej lojtarëve më të rëndësishëm të skuadrës, përveç nëse arrin një ofertë prej 75 milionë eurosh.

Nëse transferimi realizohet, kalimi i Rodrit në “Santiago Bernabéu” do të ishte një nga marrëveshjet më të bujshme të merkatos së verës 2026.