Kuvendi Komunal i Kamenicës ka mbajtur mbledhje solemne me rastin e 100-vjetorit të lindjes së heroit kombëtar, Metush Krasniqi.

Në nderim të figurës dhe veprës së Heroit Kombëtar Metush Krasniqi në këtë mbledhje solemne ishin të pranishëm Kryesuesja e Kuvendit Komunal, Arbnore Beqiraj-Fera, Kryetari i Komunës, Kadri Rahimaj, Nënkryetarja Arta Bajralija, asamblistët komunalë, drejtorët e drejtorive komunale, Komandanti i Stacionit Policor në Kamenicë, Basri Shkodra, përfaqësues të Forcës së Sigurisë së Kosovës (FSK), përfaqësues të institucioneve publike, familjarë, bashkëpunëtorë, qytetarë dhe të ftuar të tjerë.

Kryesuesja e Kuvendit Komunal, Arbnore Beqiraj-Fera, në fjalën e saj tha se është nder dhe kënaqësi që në emër të Komunës së Kamenicës të mirëpresë të pranishmit në këtë seancë solemne, kushtuar 100-vjetorit të lindjes së Heroit Kombëtar, Metush Krasniqi.

“Sot jemi mbledhur për të nderuar kujtimin, jetën dhe veprën e një figure të rëndësishme të historisë sonë kombëtare, Metush Krasniqit.

Në këtë përvjetor të veçantë, kujtojmë me respekt të thellë kontributin e tij dhe sakrificën e tij për çështjen kombëtare. Në emër të Kuvendit Komunal të Kamenicës, ju falënderoj të gjithëve për pjesëmarrjen në këtë seancë solemne dhe për nderimin që po i bëjmë së bashku figurës së Heroit Kombëtar, Metush Krasniqi”, ka thënë Kryesuesja Beqiraj-Fera.

Kryetari i Komunës së Kamenicës, Kadri Rahimaj, në fjalën e tij para të pranishmëve, tha se 100-vjetori i lindjes së Heroit të Kombit, Metush Krasniqi është një moment i rëndësishëm për të kujtuar dhe nderuar një prej figurave më të shquara të Kamenicës dhe të historisë kombëtare shqiptare.

“Jemi mbledhur sot për të nderuar dhe kujtuar një prej bijve më të shquar të Kamenicës dhe të historisë sonë kombëtare, Heroit të Kombit, Metush Krasniqi. Sot, në 100-vjetorin e lindjes së tij kujtojmë një njeri që jetën e tij ia kushtoi një ideali më të madh se vetja: lirisë, dinjitetit dhe të drejtave të popullit shqiptar të Kosovës. Metush Krasniqi nuk zgjodhi rrugën e heshtjes. Ai zgjodhi të fliste kur të tjerët detyroheshin të heshtnin, të organizohej kur organizimi konsiderohej rrezik dhe të qëndronte kur përballë tij qëndronte një sistem represiv. Ai e dinte se një ditë mund të mos e shihte vetë Kosovën e lirë, por besonte se detyra e tij ishte të mbillte farën e lirisë për brezat që do të vinin pas tij”, ka thënë Kryetari Rahimaj.

Ndër të tjera i pari i komunës tha se kujtimi për Metush Krasniqin duhet të jetë pjesë e përhershme e kujtesës sonë kolektive dhe se brezat e rinj duhet ta njohin veprën dhe sakrificën e tij.

“Sot, kur e shohim Kosovën si Republikë të pavarur dhe flamurin tonë të valëvitet lirshëm, duhet ta kuptojmë se kjo e ardhme është ndërtuar nga shumë breza. Njëri prej tyre ishte brezi i Metush Krasniqit. Prandaj, ta kujtosh Metush Krasniqin do të thotë të kujtosh një pjesë të rëndësishme të historisë së rezistencës politike shqiptare në Kosovë. Në 100-vjetorin e lindjes së tij, përulemi me respekt para veprës së Heroit të Kombit, Metush Krasniqi. Para një veprimtari që nuk u pajtua me padrejtësinë. Para një patrioti që e vuri idealin mbi rehatinë personale. Sot, një shekull pas lindjes së tij, detyra jonë është jo vetëm ta kujtojmë, por edhe t’ua përcjellim brezave të rinj historinë dhe vlerat për të cilat ai qëndroi. Sepse liria ka një histori. Dinjiteti ka një çmim. Dhe e ardhmja ndërtohet mbi kujtesën dhe sakrificën e atyre që punuan për të. Lavdi e përjetshme Heroit të Kombit, Metush Krasniqi”, tha Kryetari Rahimaj.

Mbledhja solemne u zhvillua në kuadër të aktiviteteve të organizuara për shënimin e 100-vjetorit të lindjes së Heroit Kombëtar Metush Krasniqi, me qëllim të nderimit të figurës së tij dhe të promovimit të trashëgimisë historike e kombëtare që ai përfaqëson.