Kryetari i Prishtinës, Përparim Rama, ka kritikuar Qeverinë në detyrë të udhëhequr nga Albin Kurti, para nisjes së protestës së komunave para Qeverisë së Kosovës.

Rama ka akuzuar Vetëvendosjen se po i përdor institucionet kundër qytetarëve, duke kundërshtuar atë që e konsideron si përpjekje për centralizimin e proceseve dhe cenimin e kompetencave të pushtetit lokal.

Sipas tij, një qasje e tillë nuk i shërben Kosovës dhe përbën kthim drejt një sistemi të centralizuar.

“Vetëvendosje po i përdor institucionet kundër qytetarëve. Nuk mund të centralizohen të gjitha proceset. E kemi provuar këtë, kemi pasur komunizëm. A i vyn komunizmi këtij vendi? Pse dënohen qytetarët që s’e kanë votuar Vetëvendosjen?”, ka deklaruar Rama.

Kryetari i Prishtinës ka ngritur kështu edhe pretendimin se qytetarët e komunave që nuk kanë votuar për LV-në po përballen me pasoja për shkak të bindjeve të tyre politike.

Deklaratat e Ramës vijnë në kohën kur disa kryetarë komunash janë mbledhur në Prishtinë për të protestuar kundër, siç kanë thënë, cenimit të kompetencave komunale dhe problemeve me financimin nga niveli qendror.