Avokatët e huaj të kryebashkiakut të Tiranës, Erion Veliaj, kanë kërkuar nga SPAK një takim të dytë me të, i cili pritet të zhvillohet më 10 shtator.

Sipas kërkesës së mbrojtjes, takimi do të shërbejë për përgatitjen e aplikimit në Gjykatën Evropiane për të Drejtat e Njeriut në Strasburg, për të kundërshtuar masën e sigurisë “arrest në burg” ndaj Veliajt.

Gjatë takimit, kryebashkiaku i Tiranës pritet të firmosë dokumentet që do t’i hapin rrugë apelimit në Gjykatën e Strasburgut.

Kjo lëvizje e avokatëve vjen pas dy vendimeve të Gjykatës Kushtetuese, e cila ka rikthyer për shqyrtim në Gjykatën e Lartë çështjen e masës së sigurisë ndaj Veliajt. Kushtetuesja ka kërkuar një arsyetim më të qartë lidhur me nevojën e vazhdimit të paraburgimit dhe mundësinë e zëvendësimit të tij me një masë më të butë.

Gjykata e Lartë ka caktuar 15 shtatorin, në orën 09:30, për shqyrtimin e masës së sigurisë ndaj kryebashkiakut të Tiranës.

Veliaj ndodhet në paraburgimin e Durrësit që prej shkurtit të vitit 2025 dhe, sipas të dhënave të publikuara, është i vetmi person në procesin gjyqësor ndaj të cilit vijon masa e sigurisë “arrest në burg”.

Ndërkohë, procesi gjyqësor ndaj Veliajt, bashkëshortes së tij Ajola Xoxa dhe të pandehurve të tjerë vijon në GjKKO, në fazën e shqyrtimit të themelit.

Nëse kërkesa dorëzohet, beteja ligjore e Veliajt për masën e arrestit pritet të zgjerohet edhe në Gjykatën Evropiane për të Drejtat e Njeriut në Strasburg.