Pjesëtarët e Forcës së Sigurisë së Kosovës (FSK) janë renditur në vendin e dytë në garën “Ushtari më i mirë”, e zhvilluar në shtetin e Ajovës në ShBA.

Komandanti i FSK-së, gjenerallejtënant Bashkim Jashari, i ka pritur në takim pjesëtarët që kanë përfaqësuar Kosovën në këtë garë, duke i dekoruar me medalje për rezultatet e arritura.

Sipas njoftimit të FSK-së, pjesëtarët kanë treguar nivel të lartë të përgatitjes profesionale, fizike dhe ushtarake gjatë garës.

“Me këtë rast, komandanti i FSK-së, gjenerallejtënant Bashkim Jashari, i dekoroi pjesëtarët me medalje për rezultate të larta, në shenjë vlerësimi për përkushtimin, profesionalizmin dhe suksesin e treguar gjatë garës. Suksesi i tyre përbën një vlerë të shtuar për FSK-në dhe dëshmi të përgatitjes së vazhdueshme të pjesëtarëve të saj sipas standardeve më të larta ushtarake”, është thënë në njoftimin e FSK-së.