Përfaqësuesi special i Sekretarit të Përgjithshëm të OKB-së dhe shefi i UNMIK-ut, Peter Due, në raportin e tij të fundit për Kosovën, i cili mbulon periudhën nga 16 marsi deri më 15 shtator 2026, ka folur për situatën në Kosovë gjatë kësaj periudhe.

Ai foli për protestat që u zhvilluan së fundmi në Prishtinë pas vendimit të 16 shtatorit nga Gjykata Speciale në Hagë ndaj ish-krerëve të UÇK-së.

Sipas tij, Policia e Kosovës, përgjithësisht, është sjellë në mënyrë profesionale gjatë gjithë kohës sa janë zhvilluar protestat.

Megjithatë, ai tha se koordinimi dhe ndarja e informatave me Kombet e Bashkuara ishte joadekuate.

“Policia e Kosovës njoftoi organizatat tjera ndërkombëtare, por jo Kombet e Bashkuara, një shembull i bashkëpunimit të kufizuar që autoritetet në Prishtinë i japin UNMIK-ut. Koordinimi operacional midis aktorëve ndërkombëtarë ishte më pak se optimal”, u shpreh shefi i UNMIK-it.

Due tha se këto çështje i ka ngritur edhe me autoritetet e Kosovës e edhe me partnerët ndërkombëtarë.

Shefi i UNMIK-ut foli edhe për ndryshimet në Ligjin për Dhomat e Specializuara të Kosovës në Hagë, për çka tha se i kufizohen kompetencat e tyre.

“E theksoj edhe brengosjen e shprehur nga BE-ja. Të pandehurit kanë të drejtë të apelit, por integriteti dhe pavarësia e procedurave gjyqësore duhet të respektohet dhe çdo veprim legjislativ duhet të jetë në përputhje të plotë me obligimet ligjore dhe ndërkombëtare të Kosovës”, deklaroi Peter Due.