Ambasada e Shteteve të Bashkuara të Amerikës (ShBA) në Shqipëri, ka njoftuar se ShBA-ja është duke mundësuar udhëtime të sigurta dhe të mbrojtura për të gjithë sportdashësit ndërkombëtarë që dëshirojnë të udhëtojnë drejt Amerikës për të ndjekur Kupën e Botës FIFA 2026.

Në njoftimin e publikuar në rrjetet sociale, Ambasada ka theksuar se autoritetet amerikane janë plotësisht të përgatitura për të përpunuar aplikimet për vizat e vizitorëve dhe u bën thirrje të gjithë udhëtarëve që kanë nevojë për vizë të aplikojnë sa më herët.

“Shtetet e Bashkuara janë të gatshme të mirëpresin tifozët ndërkombëtarë dhe inkurajojmë të gjithë ata që kanë nevojë për vizë amerikane të aplikojnë tani”, ka njoftuar Ambasada e ShBA-së në Shqipëri.

Kupa e Botës FIFA 2026 do të zhvillohet në ShBA, Kanada dhe Meksikë, ndërsa pritet një rritje e ndjeshme e kërkesës për viza turistike nga vendet e tjera.