Zyrtari i lartë i AAK-së, ish-deputeti Daut Haradinaj, ka prezantuar ish-bashkëluftëtarin e tij, Blerim Bajramaj – Leci, si kandidat për deputet në Kuvendin e Kosovës, në zgjedhjet e parakohshme që do të mbahen më 28 dhjetor 2025.

Haradinaj ka thënë se Leci ka marrë pjesë në luftën e Kosovës, si edhe në Preshevë dhe në Iliridë në Maqedoni.

Njoftimi i plotë i Haradinajt:

Në garën e ardhshme nacionale po hyn edhe njëri ndër bashkëluftëtarët e mi, Blerim Bajramaj-Leci. Blerimi, që në ditët e para të luftës u plagos rëndë, por me moral të lartë, pavarësisht plagëve, ai qëndroi në vijat e frontit për 18 muaj në kuadër të Brigadës 131 “Jusuf Gërvalla”.

Çlirimi i Kosovës nuk ishte çlirim për tërë shqiptarët, dhe Blerimi ndër të parët ishte në Luginën e Preshevës, në luftë për të drejtat e vëllezërve tanë, përkrah Shefket Musliut e shumë luftëtarëve të tjerë.

Ai, edhe pas mbarimit të luftës dhe Marrëveshjes së Konçulit, menjëherë iu bashkua luftëtarëve të lirisë në Iliridë (Maqedoni). Në këtë luftë u dallua si luftëtar me përvojë dhe arriti të krijojë mbrojtje të pashembullt për popullatën tonë atje.

Krahas luftëtarëve të Ali Ahmetit e Gëzim Ostrenit, Blerimi me shokë si Kreshnik Mushkolaj, Zhujë Hamzaj, Faik Luli e shumë të tjerë, ishin krah i Fadil Nimanit (Tigrit) dhe Tahir Sinanit e Maliq Ndrecës.

Ai, pas përfundimit me sukses të luftërave çlirimtare, u angazhua për plot 25 vite për funksionimin e sigurt të Ramush Haradinajt. Sot ai po e fillon një betejë të re, por tani betejë politike. Do ta kem për nder që do të bashkërrugëtojmë në këtë garë elektorale, me bindjen e plotë se do të kontribuojmë në unifikimin e faktorit shqiptar në rrugën tonë euroatlantike.