Zëvendësimi i zyrtarit më të lartë të sigurisë kombëtare të Iranit, Ali Larijani, pasi ai u vra në një sulm izraelit të martën, nuk do të jetë detyrë e lehtë.

Politikani veteran konsiderohej nga shumë analistë si vendimmarrësi më i rëndësishëm në vend, një negociator i aftë që mund të punonte ndërmjet kampeve të ndryshme brenda regjimit dhe në nivel ndërkombëtar.

Sipas ligjit, presidenti iranian Masoud Pezeshkian do të jetë ai që do ta emërojë këshilltarin e ardhshëm për siguri kombëtare dhe spekulimet po qarkullojnë se figura me ndikim e regjimit, Saeed Jalili, mund ta marrë këtë rol, shkruan CNN.

Analistët thonë se ekziston një precedent i fortë që kjo detyrë t’i jepet njërit prej përfaqësuesve të Udhëheqësit Suprem në Këshillin e Sigurisë Kombëtare. Vdekja e Larijanit e lë Jalilin si një opsion të mundshëm – ai ka shërbyer më parë si këshilltar për siguri kombëtare, ka qenë negociator kryesor bërthamor dhe është anëtar aktual i Këshillit për Përcaktimin e Interesit të Shtetit.

“Jalili është një ultra-konservator i ashpër, udhëheqës i pjesës më të zëshme anti-perëndimore dhe ekstremiste të regjimit”, tha analisti dhe autori Arash Azizi, i cili është gjithashtu ligjërues dhe historian në Universitetin Yale.

“Ngjitja e tij në këtë pozitë do të theksonte një zhvendosje të fortë drejt linjës së ashpër, pasi Larijani konsiderohej shumë më tepër një figurë qendrore dhe pragmatike”.

Megjithatë, Jalili mund të jetë më pak i aftë për të punuar brenda pjesëve të ndryshme të sistemit sesa ishte Larijani.

“Ngurtësia dhe ekstremizmi i tij mund të bëhen një dobësi për regjimin dhe ta ulin aftësinë e tij për të manovruar në situatën e vështirë në të cilën ndodhet”, tha Azizi.

Garda Revolucionare elitare “mban shumë nga pushteti real në Iran sot” dhe për këtë arsye mund të dëshirojë dikë me “më shumë përvojë ushtarake që mund të jetë më i përshtatshëm për momentin aktual”, shtoi Azizi.

Kushdo që të zgjidhet si zëvendësues i Larijanit do të ketë një rol të madh në çdo negociatë për t’i dhënë fund luftës.

“Meqë Këshilli i Sigurisë Kombëtare është tani qendra kryesore e pushtetit në Iran, kushdo që e zëvendëson Larijanin në këshill do ta formësojë balancën e pushtetit të regjimit dhe do të ndikojë në qëndrimin e tij ndaj SHBA-së dhe Izraelit në çdo negociatë të mundshme”, tha Azizi.

Pas vdekjes së Larijanit, Jalili publikoi një mesazh duke thënë: “këto veprime nuk do ta shpëtojnë armikun e dobët nga bataku në të cilin është zhytur; përkundrazi, ato do ta përshpejtojnë rrugën e humbjes dhe poshtërimit të tij”, raportoi agjencia e lajmeve Tasnim e lidhur me shtetin.