Muaji shkurt i këtij viti ka sjellë një rritje të dukshme të aktivitetit në sektorin e hotelerisë në Kosovë, duke reflektuar një trend pozitiv të vizitave dhe qëndrimeve krahasuar me të njëjtën periudhë të vitit paraprak.

Të dhënat tregojnë se interesi për të qëndruar në hotele është rritur si nga vizitorët vendorë, ashtu edhe nga ata ndërkombëtarë.

Në total, në hotele janë regjistruar 56 644 vizitorë, prej të cilëve 24 416 ishin vendorë, ndërsa 32 228 vizitorë ishin të huaj. Krahasuar me shkurtin e vitit 2025, kur numri total i vizitorëve ishte 51 795, kjo paraqet një rritje prej 9.4 për qind, duke dëshmuar një gjallërim të sektorit të turizmit dhe hotelerisë në vend.

Rritja nuk është reflektuar vetëm në numrin e vizitorëve, por edhe në kohëzgjatjen e qëndrimit të tyre.

Numri total i net-qëndrimeve arriti në 112 367, ku 60,513 netë (53.8 për qind) i përkasin vizitorëve të huaj, ndërsa 51854 netë (46.1 për qind) vizitorëve vendorë. Kjo tregon se vizitorët e jashtëm jo vetëm që po vijnë më shumë, por edhe po qëndrojnë më gjatë në Kosovë.

Sa i përket vizitorëve të huaj, të dhënat tregojnë një rritje të konsiderueshme prej 16.1 për qind krahasuar me shkurtin e vitit 2025. Në veçanti, disa shtete dominojnë listën e origjinës së turistëve.

Vizitorët nga Shqipëria vazhdojnë të përbëjnë numrin më të madh, me 10 820 vizitorë në shkurt 2026, megjithëse kjo paraqet një rënie prej 10.2 për qind krahasuar me një vit më parë. Po ashtu, edhe net-qëndrimet nga ky shtet kanë pësuar rënie prej 23.4 për qind, duke zbritur në 15 026.

Në anën tjetër, një rritje e fortë vërehet te vizitorët nga Gjermania, të cilët arritën në 3 175 vizitorë, ose 26.5 për qind më shumë se në vitin 2025. Edhe net-qëndrimet nga ky shtet janë rritur ndjeshëm, duke shënuar 6 851 netë, që përkthehet në një rritje prej 43.0 për qind.

Rritje pozitive shënon edhe Zvicra, me 2,300 vizitorë (+7.3 për qind) dhe 4 342 net-qëndrime (+26.9 për qind), duke dëshmuar një interes të qëndrueshëm nga diaspora dhe turistët nga ky vend.

Ndërkohë, Turqia ka shënuar një rënie, me 2,637 vizitorë (-21.4 për qind) dhe 4 177 net-qëndrime (-5.7 për qind), duke treguar një zbehje të lehtë të fluksit nga ky treg.

Një rritje e ndjeshme vihet re edhe te grupi i shteteve të tjera, ku numri i vizitorëve ka arritur në 13 296 (+15.6 për qind), ndërsa net-qëndrimet janë rritur në 30 117 (+27.9 për qind).

Në përgjithësi, këto të dhëna tregojnë se sektori i hotelerisë në Kosovë po vazhdon të rimëkëmbet dhe të zgjerohet, me një rritje të qëndrueshme të interesit nga vizitorët e huaj.