Ermal Panduri: Shikues të RTV Dukagjini jemi zhvendosur në këtë pjesë të emisionit Debat Plus në Tetovë.
Çështja e gjuhës shqipe në Maqedoninë e Veriut është bërë temë edhe në Kosovë.
Është diskutuar gjërë e gjatë.
Si ndodhi që gjuha shqipe nuk qenka gjuhë zyrtare?
Jam në selinë e BDI-së, dhe kam kë tjetër, pos të parin e këtij subjekti politik, njeriun që e bëri këtë Maqedoni që është, Ali Ahmeti. Z. Ahmeti kënaqësi me ju pas në Debat Plus.

Ali Ahmeti: Mirë se keni ardh.

Ermal Panduri: Zotri Ahmeti, çështja e gjuhës shqipe, asgjë s’kishi pas bë me gjuhën shqipe, s’ishte pjesë e kushtetutës, nuk kishte qenë. Si e keni lënë këtë punë?

Ali Ahmeti: E ke nis ters…

Ermal Panduri: E nisa ters, sepse ters po get është puna e gjuhës shqipe.
A e parasheh Kushtetuta, a e parasheh ligji për gjuhët gjuhën shqipe?
Ali Ahmeti: Atëherë, për ju Ermal Panduri, duhet me ju shpjegu fillimin e ortegut të Marrëveshjes paqësore të Ohrit.
Në Marrëveshje të Ohrit, gjuha shqipe ka qenë e shkruar në të zezë e në të bardhë.
Gjuha shqipe.
Mirëpo, gjatë negociatave, pala maqedonase ka rezistuar që të mos shkruhet gjuhe shqipe.
Dhe negociatorët, që nga SHBA-të ka qenë z. Pardju dhe nga Evropa z. Leotar.
Përfaqësues për lehtësim të negociatave – ndërmjetës. Ndërmjetësues në mes të Shtabit të përgjithshëm të ushtrisë dhe palës negociuese në Ohër ka qenë Piter Faith, që është gjallë dhe është mirë me shëndet sepse ambasadori Pardju dhe Leotar nuk jetojnë dhe ndjesë paçin sepse kanë qenë kontribues të jashtëzakonshëm. Dhe, vjen Peter Faith dhe thotë: z. Ahmeti, substancën nuk e rrezikoni, bëje një kompromis.
Gjuhën të cilën e flasin mbi 20%, gjithashtu është gjuhë zyrtare.
Dhe ta tejkalojmë rrezistencën që paraqesin përfaqësuesit maqedonas.
Kjo është porosia nga Pardju dhe Leotar.
Sepse, as Pardju as Leotar pa konsulta, përmes ndërmjetësimit që e bënte Peter Faith, nuk bënin asnjë lëvizje dhe asnjë ndërhyrje.
Dhe ne e kemi pranuar.
Jam konsultuar edhe me Arben Xhaferin edhe me Imer Imerin, dhe e kemi bërë këtë lëvizje.
Marrëveshjen e Ohrit nuk do e pranonim ne pa gjuhë zyrtare – gjuhën shqipe.
Dhe është e sanksionuar e zeza me të bardhë.
Gjuhën të cilën e flasin mbi 20% gjithashtu është gjuhë zyrtare si dhe alfabeti i saj në të gjitha institucionet shtetërore.
Si që do të përcaktohet me ligj.
Dhe ky është ligji që e sanksionon gjuhën të përkthyer në ligj.
Gjuha shqipe është zyrtare dhe ky ligj është ligj për përdorimin e gjuhës shqipe në të gjitha nivelet, institucionet e shtetit.
Polici, gjykata, prokurori, qeveri.
Në qeveri janë të instaluara kufjet, kabinat për përkthim.
Merrni hedhni një sy të gjitha institucioneve, prej presidencës, edhe në gjuhën shqipe.
Parlamenti, gjykatat, krejt janë mbishkrimet në gjuhën shqipe.
Dhe problemi është që kësaj ngjarje u kanë paraprirë edhe zhvillime tjera.
Për fat të keq partitë politike maqedonase nuk kanë punuar me elektoratin e vet për t’ju shpjeguar dhe për ta kuptuar që tanimë ky shtet është edhe i shqiptarëve.
Nuk e kam pasur të lehtë unë 2002 – 2003 kur jam angazhuar në politikën legale.
Sepse njerëzit nëpër tubime, nëpër takime më pyesin pse nuk e bëre Shqipëri.
Mirëpo rrethanat nuk kanë qenë të favorshme, por të disfavorshme, sa për shqiptarët ashtu edhe për maqedonasit, nëse do kishim hyrë në projektin e ndarjes.
Sepse vijat e demarkacionit ishin goxha të komplikuara dhe delikate për t’i ndarë.
Dhe ne po të hynim në këtë ofertë që mua mu bë si ushtri, për ndarje, që është e vërtetë, prej kreut të shtetit.
Kërkesën nga kreu i shtetit ma solli Arben Xhaferi dhe për mua ishte e papranueshme sepse do ngeleshin jashtë përfshirjes së shqiptarëve mbi 250 mijë shqiptarë që duheshte të ekstradohen nga Shkupi, Kumanova, Ohri, Kërçova, Struga, Manastiri, Velesi në dy qytete, në Tetovë, Gostivar edhe një komunë Zajaz dhe Osllome që quheshte. Zajazi është vendlindja ime.
260 mijë shqiptarë dhe 60 mijë maqedonas të ekstradohen në pjesën tjetër.
Dibra do mbeteshte me Shqipëri. Tetovë, Gostivar, Dibër, Zajaz dhe Osllome gjithashtu me Shqipëri, kurse Likova me Kosovë.
Vërtetë ishte e dhimbshme dhe tragjike po të pranoheshte një projekt i tillë.
Dhe sigurisht, Marrëveshja e Ohrit është kompromis dhe nuk ka kompromis që i gëzon e i kënaq palët.
Unë jam përpjek me ju shpjegu shqiptarëve që nga 2002 deri më sot që kjo është zgjidhja më e mirë përderisa nuk kemi një shpikje tjetër të filozofisë politike, përveç kompromisit nuk kemi zgjidhje më të mirë.
Mirëpo maqedonasit pak kanë punuar me elektoratin e tyre.
Si VMRO ashtu edhe LSDM.
Kush ka qenë përcaktimi dhe angazhimi i tyre – shqiptarët po na e marrin shtetin.

Ermal Panduri: Në fakt me këtë premtim Mickoski erdhi në pushtet.

Ali Ahmeti: Me propagandë: Shqiptarët e kanë marrë shtetin.
Të hapen rastet e Hagës….
Kthim pas!
Çka është këtu që më ka dëshpëruar.
Pavarësisht- kryeministri i Kosovës mbështetjes që u jepte lëvizjeve këtu, që bëri përpjekje për t’i bashkuar në një mekanizëm të quajtur VLEN, është përcaktimi i tij, është mendimi i tij.
Arsyet e vërteta nuk i di.
Por, që ne na deligjitimoi dhe që i dha argument Hristijan Mickoskit dhe fuqi politike që kryeministri i Kosovës po i mbështet këto forca politike.
“Kryeministri i Kosovës po del dhe thotë të vërtetën se gjuha shqipe kurrë s’ka qenë zyrtare.”
Dhe me javë të tëra antishqiptarët më të mëdhenj e vendosin në ekran kryeministrin e Kosovës, që mua më gërryente në shpirt: Ja kryeministri i Kosovës thotë që gjuha shqipe s’ka qenë zyrtare dhe nuk është zyrtare.
Ishte kryeministri i Kosovës që shqiptarëve të këtuhit ua hoqi të drejtën legjitime, legjitimitetin.
Fronti Evropian ishte fitues i zgjedhjeve.

Ermal Panduri: Kishte më shumë deputetë!

Ali Ahmeti: Pesë mandate kishte më shumë.
Çka ndodhi?
U bënë bashkë LSDM, VMRO dhe na e morën deputetin e 19-të.
Na e morën deputetin e 19-të.
Sepse ne ishim partia e dytë në Republikë.
Dhe partia e dytë ka shumë beneficione.
Ka KSHZ-në, ka televizionin, ka përfaqësimin ndërkombëtar.
Na e hoqën një mandat me dredhi e me lloj lloj makinerish.
Kjo më ka brengosë nga kryeministri sepse i tërë devalvimi i situatës këtu asnjë hap para nuk ka shku.
Qe dy vjet këtu nga një hap pas shkohet, kontestohet gjuha dhe nuk përdoret më siç është përdor nëpër institucione.
Përfaqësimi i drejtë…

Ermal Panduri: Ke arrogancë të theksuar të ministrave…

Ali Ahmeti: Përfaqësimi i drejtë është heq me moton “Jo etni, por cilësi”.
“Jo etni, por cilësi”, nëpër komisione i ke krejt maqedonas.

“Ermal Panduri nuk i plotëson kushtet sepse Zhivku është shumë më i mirë sesa Ermali”, këtë të sjell “Jo etni, por cilësi”.
Kjo më ka dëshpëruar.

Ermal Panduri: Keni pas komunikim me Albin Kurtin?

Ali Ahmeti: Më herët po.

Albin Kurti ka qenë në disa vizita këtu në selinë time, me orë të tëra, nga pesë ore e gjashtë orë.
I kam bërë shpjegime mbi zhvillimet në Republikën e Maqedonisë së Veriut, mbi organizimet politike, mbi platformat politike, mbi zhvillimet më të komplikuara dhe delikate, jo vetëm në Maqedoni por edhe në nivel kombëtar.
Edhe nivel rajonal.
Përsëri po them, pavarësisht mbështetjes që u ka dhënë, po s’paku, s’paku të mos devalvonte çështja shqiptare në këto përmasa kaq serioze, sepse shqiptarëve në Maqedoni u duhet kohë për ta riparuar tani këtë gjendje që është krijuar.
Aq më keq në prononcim lidhur me përdorimin e gjuhës shqipe.

Ermal Panduri: Ju po thoni që ia keni pa sherrin asaj deklarate të Albin Kurtit?

Ali Ahmeti: Jo sherrin, po ajo po shihet prej hënës që i ka dëmtu jashtëzakonisht shqiptarët e Maqedonisë.

Ermal Panduri: Kam ca çështje, që në prizmin tuaj Albin Kurti ju doli në krah VLEN-it, nga ana tjetër kur i pyet këta të VLEN-it thonë që Edi Rama i doli në krah dhe vazhdon t’i del në krah përherë Ali Ahmetit dhe BDI-së.
Duket sikur Kosova dhe Shqipëria kanë preferenca të ndryshme.

Ali Ahmeti: Tani këto janë legjenda që nuk i ndal dot.

Por, po ua sjell në kujtesë Fatos Nanon, lavdi dhe ndjesë pastë.
Në 2006-tën më thirr Fatos Nano më thotë eja në Pogradec të të takoj.
I thash s’mundem nesër.
Pasnesër ika në Korçë dhe e takova. Më tha a e din pse të kam thirrë, i thash jo.
Tha lëre çka them unë në televizion, unë zgjedhjet i kam humbur.
Unë zgjedhjet i kam humbur!
As Sali Berisha nuk është i Serbisë, as unë nuk jam i Greqisë, por kemi hy në këtë fushatë të ndyrë dhe nuk e dimë se si do dalim, por ty të duhet shteti.
Dhe ti nuk e ke takuar asnjëherë Sali Berishën.
Dhe unë do ta rregulloj situatën se ty të duhet shteti.
Ty të duhet shteti.
Dhe mua më duhet shteti i Kosovës, mua më duhet shteti i Shqipërisë. Unë si kam kontakte me Edi Ramën, unë kam bërë përpjekje ta takoj edhe Albin Kurtin.
Por unë kam pasur takime dhe ndjej kënaqësi t’i falënderoj prej Ibrahim Rugovës, Isa Mustafës, dhe të gjithë me radhë, Ramush Haradinaj, Hashim Thaçi, se kam punuar me shtetin e Kosovës.
Ne na është dashur ndihma e shtetit shqiptar, e shtetit të Kosovës sepse çështja është shumë e mprehtë dhe delikate, e Marrëveshjes së Ohrit dhe bashkëjetesa me bashkëqytetarët tanë maqedonas. Sepse ne nuk jemi duke punuar dhe duke u angazhuar njësoj, si partitë politike maqedonase, si partitë politike shqiptare.
Ne punojmë dhe angazhohemi për një Maqedoni stabile, për një Maqedoni të integruar në NATO, të integruar në Bashkimin Evropian, me zero problem me fqinjët, por me shqiptarët të barabartë dhe jo qiraxhinj e hyzmeqarë si në vitet e para 2001-shit.
Dësha të bëj edhe një sqarim.
A është e barabartë shqipja me maqedonishten në përdorimin zyrtar, përjashto përveç për përdorim të jashtëm që shqipja nuk përfshihet në Marrëveshjen paqësore të Ohrit.
Do të thotë që ambasadat jashtë Maqedonisë, ato gjuhë zyrtare e kanë vetëm gjuhën maqedonase. Por kjo nuk do të thotë që nëse vetëdijësohen e ndërgjegjësohen bashkëqytetarët tanë maqedonas, partitë politike maqedonase, që ky shtet bëhet më i fortë me shqiptarët.
Pa shqiptarët, nuk e kam as për kërcenim, as për frikësim, por pa shqiptarët ky shtet nuk ka ekzistencë, nuk mund të ekzistojë. Shqiptarët nuk janë minoritet në këtë shtet.
Janë popull shtetformues.
Janë vetë shqiptarët në këtë shtet më shumë sesa shteti i Malit të Zi. Si me banorë, si me territor. Dhe ne duam paqe, stabilitet dhe komunikim të përhershëm me partitë politike maqedone.
Por partitë të cilat janë të përgjegjshme dhe të ndergjegjshme.

Ermal Panduri: A po duan partitë maqedonase komunikim me ju z. Ahmeti?

Ali Ahmeti: Kur e prek Marrëveshjen e Ohrit, gjuhën, sigurisht që nuk ka vullnet, nuk duan!
Por Marrëveshja e Ohrit është dokument ndërkombëtar. Marrëveshjen e Ohrit e kanë garantuar SHBA-të, Bashkimi Evropian dhe NATO.
Dhe ne u kemi besuar Shtetve të Bashkuara të Amerikës, i kemi besuar Bashkimit Evropian, i kemi besuar NATO-s.

Ermal Panduri: Dhe kur po preket kjo Marrëveshje, kur po preket kjo Marrëveshje z. Ali Ahmeti, ku është Bashkimi Evropian, ku janë SHBA-të, ku është NATO.
Sa dalin garant këta tre partnerë kryesorë dhe garantues të kësaj Marrëveshje që me e ngrit zërin, pra çfarë mekanizma ka në dorë shqiptaria e Maqedonisë me thënë që këtu është duke u shkel kjo Marrëveshje e Ohrit.
Duke e pas parasysh Ali Ahmeti, pse po e ngris kështu këtë çështjë është sepse numrat e VMRO-DPMNE-së janë të frikshëm, a ka gjasë edhe sikur ju të ishit në pushtet me këto numra të VMRO-DPMNE-së nuk do të mund ta mbanit këtë standard që e keni vendosur para se hynin VLEN me VMRO-në në pushtet?

Ali Ahmeti: Po filloj te e para.
Kam besuar, besoj, do të besoj te Amerika.
Kam besuar, besoj, do të besoj te Bashkimi Evoprian.
Kam besuar, besoj, do të besoj te NATO.
Asnjëherë nuk jam zhgënjyer.
Kjo vepër kapitale e Marrëveshjes së Ohrit, të arriturat që janë bërë deri më sot, dhe këta po i gërryejnë, po i heqin një nga një, është si rezultat i punës së përbashkët që kemi bërë, Amerikë, Evropë dhe NATO.
Dhe unë asnjëherë nuk dyshoj që nuk do të ngritet zëri i vërtetë i Amerikës, i Evropës dhe i NATO-s sepse pas kësaj Marrëveshje është presidenti i atëhershëm Xhorxh Bush, është Gregori Xhonson – drejtues i forcave të NATO-s në Napoli, është Peter Faith, është Alain Le Roy në emër të Bashkimit Evropian, është David Filips si ndërmjetësues dhe lehtësues.
Dhe une u kam drejtuar letër të gjithë kontribuesve, të gjithë autorëve dhe aktorëve, janë mbi 100, letër të hapur, për rrezikun që i kanoset Marrëveshjes dhe paqes në rajon.

Ermal Panduri: Ju po thoni që rrezikohet paqeja?

Ali Ahmeti: Maqedonia është udhëkryq dhe aksidentet bëhen në udhëkryq, jo në rrugë të drejtë.
A ke dëgju ndonjë aksident në rrugë të drejtë, në udhëkryq përplasen.

Ermal Panduri: Vetëm ngasësit e këqinj që bëjnë në rrugë të drejtë.

Ali Ahmeti: Ato janë vetëaksidente.

Ermal Panduri: Te çështja e mundësisë për ndikim nëse edhe ju do të ishit në pushtet me këto numra të frikshëm të VMRO-së.

Ali Ahmeti: Më shumë se kaq mandate ka pas VMRO-ja në bashkëqeverisje kur kemi qenë ne.
I ka pas 63 mandate.
Tash nuk i ka 63 mandate, i ka 56 mandate.
63 mandate i ka pas.
Mirëpo BDI-ja kur është ulur, është ulur në tavolinë dhe ka bërë marrëveshje.
Të gjitha marrëveshjet janë jetësuar dhe materializuar.
Hap pas hapi.
Jo me pritjet që i kemi pas, as ne as ata.
Ata mbase kanë menduar me e ngadalësu hapin, ne kemi vepru me e përshpejtu hapin, por është gjet një mesatare.
Jo duke vrapuar, por duke ecur.
Do të thotë hap pas hapi kemi bërë avancim të çështjes të shqiptarëve si moment që del dhe buron nga Marrëveshja e Ohrit për barazi të plotë në mes dy komuniteteve më të mëdha.
Nëse kërkon, ne do hym edhe në analizë se çfarë kemi arrit.

Ermal Panduri: Mua më intereson se çfarë po ndodh sot, a po defaktorizohen shqiptarët?
Çka po ndodh me VLEN, a është duke bërë VLEN-it maksimumin e vet përballë këtyre numrave?

Ali Ahmeti: VLEN-i nuk mund të bëje punën e vet sepse kur shkon diku argat, do bësh punën që të thotë agai.
Dhe agai është Hristijan Mickoski.
Agai është ai.
Dhe ai thotë rrini urtë se unë ju kam marrë pa meritë sepse ju i keni i keni humbur zgjedhjet.
Zgjedhjet i ka fituar Fronti Evropian. Ju nuk e keni legjitimitetin të përfaqësoni komunitetin e juaj.

Ermal Panduri: VLEN-i thotë që ju nuk keni legjitimitet të votës shqiptare sepse nuk keni garuar vetëm me parti shqiptare.

Ali Ahmeti: Mos bini nën ndikim ju vëllezërit e mi në Kosovë.
Janë vendvotimet.
Dihet numri i saktë kush ka votuar në zgjedhjet që i lam pas.
Ne kemi marrë, që e kemi edhe synim, e kemi edhe qëllim t’i marrim edhe komunitetet e vogla sepse i keqpërdorin bashkëqytetarët tanë maqedonas, partitë politike maqedonase i keqpërdorin si turqët, si romët, boshnjakët, vllehët.
Dhe ne kemi hy në biseda, negociata.
Dhe mbase ne nuk kemi marrë aq sa ata prisnin.
Ne kemi marrë shumë më pak.
Po a pendohemi.
Fare nuk pendohemi.
Dhe nuk do i lëmë komunitetet e vogla.
Përseri do u japim nga hiseja jonë. Ne kemi dhënë nga hiseja jonë.
Ne u kemi dhënë mandate, nga mandatet tona.
Me qëllim që t’i afrojmë komunitetet e vogla sepse po keqpërdoren prej partive politike maqedonase.
Si turqit, si romët, si boshnjakët, si vllehët.
Dhe ne do vazhdojmë me këtë filozofi të afrimit dhe të bashkëpunimit deri te ndërgjegjësimi i komuniteteve të vogla se me ne kanë fituar komunitetet e vogla.
Ne ishim autorët e aktorët që e sollëm Marrëveshjen paqësore të Ohrit, në saje të luftës sonë fituan edhe komunitetet e vogla.
Kërkush nuk i ka llogaritur komunitetet e vogla.
Po tani trajtohen në aspektin gjuhësor, përfaqësimit të drejtë.
Psh ku janë 20% turqit e kanë gjuhën zyrtare.
Aty edhe ku s’janë 20% Marrëveshja e Ohrit e lejon nëse merren vesh, këshilli i komunës mund ta bëjë gjuhë zyrtare.
Psh gjuha turke është zyrtare në Vrapçisht, Gostivar, Kërçovë, Çair, ku turqit nuk janë 20% por janë 13-15, por gjuha turke është zyrtare sepse ka vendos këshilli i komunës dhe nuk ia mohon Marrëveshja e Ohrit, por e pranon si të tillë.
Përfaqësimi i drejtë i vllehëve, i romëve, i boshnjakëve, i turqve, si ka qenë para 2001-shit nuk është pas 2001-shit, ashtu siç ka avancu përfaqësimi i drejtë i shqiptarëve, ka avancu edhe përfaqësimi i drejtë i komuniteteve të vogla.
Por që na keni ec me hile, na keni ec me hile.
Kaq mund të them.
Edhe këtu bile po përpiqesh me më gërvisht.

Ermal Panduri: Hilja është bërë nga?

Ali Ahmeti: Shihe Ermal, unë asnjëherë nuk kam ndërhy në organizimet e brendshme në Kosovë.
Është një e vërtetë e madhe që unë shokët e mi, bashkëudhëtarët e mi i kam të organizuar PDK, në AAK. Mirëpo, në zgjedhje as më kanë kërkuar që unë të implikohem, as nuk ka qenë përcaktimi im.
Ashtu siç e thash me rastin e Fatos Nanos.
Sepse ne kemi nevojë përkrahje shtetërore.
Ne kemi nevojë që Kosova dhe Maqedonia e Veriut të keni marrëdhënie të mira.
Maqedonia e Veriut dhe Shqipëria të kenë marrëdhënie të mira.
Shihe, a ishte ky VLEN-i edhe VMRO-ja kundër Korridorit 8, a dolën tani në konferencë shtypi e thanë kjo është ngjarje historike.
Thua që atë ditë fillonte ndërtimi.

Ermal Panduri: Korridori i 8-të e ka vulën e Artan Grubit.

Ali Ahmeti: Korridori i 8-të e ka vulën e BDI-së, NATO-s, Amerikës, e ka vulën e çdo funksionari që ka pas për detyrë që 32 vjet në sirtarin që e kishin mbyllur korridorin e 8, ta hapin.
Dhe kjo është direktivë, vendim i Bashkimit Demokratik për Integrim. Dhe të ekzekutohet.
32 vjet i mbyllur në hekra.
Dhe përseri tani po cenohet dhe rrezikohet, për gervishtet edhe korridori i 8-të.

Ermal Panduri: Po rrezikohet korridori i 8-të?
Ali Ahmeti: Po rrezikohet sepse e paraparë është që korridori të vazhdojë prej Meseishte që është para Ohrit – korridori për Shqipëri, e paraparë është, e projektuar, ka marrëveshje me Shqipërinë, tunel të bëhet në Ladorishtë dhe të del në Qukës.

Ermal Panduri: E ka prezantuar Artan Grubi komplet këtë projekt.

Ali Ahmeti: Është deviju.
E kanë heq tunelin që lidh Gostivarin me Kërçovën, që është tunel prej 5 km, tash po hyp në pikën më të lartë.
Që do ketë kosto të lartë në sezonën e dimrit.
Ermal Panduri: Është i njëjti projekt mbi trasenë që e ndërtuan kinezët, në atë drejtim?
Sepse lart është edhe andej.

Ali Ahmeti: Andej ka tunel.
Në mes të Kërçovës dhe Ohrit.

Ermal Panduri: Pra, edhe mbi tunel të kinezëve shkohet në kuadër të projektit korridori 8 me devijimin që e kanë bë.

Ali Ahmeti: Tuneli është i paraparë me Shqipërinë, te Ladorishti dhe del te urra e Boshtricës në Qukës.
Është marrëveshje me Shqipërinë.

Ermal Panduri: A është devijuar?

Ali Ahmeti: Është devijuar gjoja se UNESCO e konteston, por që s’ka të bëjë me UNESCO fare sepse nuk lidhet korridori, nuk kalon në afërsi bregut të liqenit të Ohrit, por është në distancë shumë të largët.
Gjithashtu edhe këtu tuneli, vendoste qeveria kur e kryesonte kyeministër Talat Xhaferi.
Pas ardhjes në fuqi të VMRO-së me VLEN-in do të hiqet ndërtimi i tunelit.
Ndërsa është studim i mirëfillt i Fakultetit të ndërtimtarisë.
Nuk e kanë punuar shqiptarët. Mirëmbajtja, lartësia mbidetare, të gjitha janë të studiuara, se me tunel është shumë më e mirë dhe me kosto më të vogël sesa të ngjitet korridori në lartësinë 1 mijë e 100 metra.
Njëjtë si Strazha e sotme që është, e njëjta lartësi.

Ermal Panduri: Dhe ku do ndalet tash bazuar në këtë parashikim projekti nëse nuk shkon deri në Shqipëri.

Ali Ahmeti: Kjo është çështje që duhet të bisedohet, çështje ndërshtetërore.
Sepse korridori 8 nuk është as i Shqipërisë, as i Maqedonisë së Veriut.
Korridori i 8-të është i të gjitha vendeve anëtarë të NATO-s.
Ky quhet korridori i NATO-s. Do të thotë është korridori i NATO-s.
Për këtë janë bërë negociata me fondin monetar ndërkombëtar që i ka zhvilluar asaj kohe ministri i financave i RMV-së, Fatmir Besimi, dhe përgjegjësi i korridorit Artan Grubi me fondin monetar ndërkombëtar sepse nuk na lejonin ta ndërtojmë korridorin për shkak implikimeve buxhetore.
Mirëpo këtu na ka ndihmu NATO, na ka ndihmu Amerika dhe arritëm që ta realizojmë si projekt.

Ermal Panduri: Ali Ahmeti ju falënderoj shumë që ishit në Debat Plus.

Ali Ahmeti: Falemnderit për kohën tuaj.