Ministria e Bujqësisë, Pylltarisë dhe Zhvillimit Rural ka reaguar pas takimit me fermerët, duke theksuar se respekton të drejtën e tyre për protestë dhe i kupton shqetësimet lidhur me ndërprerjen e grumbullimit të qumështit dhe uljen e çmimit të tij.

Sipas ministrisë, fermerët nuk janë objekt i procedurave administrative që janë duke u zhvilluar, të cilat, siç thuhet, lidhen vetëm me operatorët e biznesit dhe respektimin e detyrimeve ligjore në sektorin e ushqimit.

Ministria ka bërë të ditur se po punon me institucionet përkatëse dhe me sektorin për të siguruar vazhdimin e grumbullimit të qumështit dhe shmangien e dëmeve ekonomike për fermerët, duke theksuar se masat e ndërmarra synojnë forcimin e sigurisë ushqimore dhe mbrojtjen e konsumatorit.

Po ashtu, theksohet se kontrollet dhe analizat laboratorike janë intensifikuar dhe se të gjithë operatorët janë të detyruar të respektojnë standardet ligjore në fuqi.

Ministria u ka bërë thirrje të gjitha palëve në sektor që të bashkëpunojnë për të garantuar një treg të rregullt, transparent dhe të qëndrueshëm të qumështit.