Italia ka dëbuar dy agjentë të dyshuar të shërbimeve sekrete ruse, të cilët ndodheshin në vend me status diplomatik, vetëm dy ditë pas arrestimit të dy ish-zyrtarëve italianë të zbulimit të dyshuar për bashkëpunim me Moskën. Qeveria italiane e ka cilësuar rastin si një “ndërhyrje të rëndë dhe të papranueshme”.

Ministri i Jashtëm, Antonio Tajani, ka thënë se Italia ka vendosur të dëbojë dy atashe ushtarakë të Ambasadës së Rusisë, pasi hetimet e Prokurorisë së Romës zbuluan përfshirjen e tyre në veprimtari spiunazhi. Sipas tij, ambasadorit rus në Romë i është komunikuar se Ivan Petrovich Gorbachev dhe Mikhail Vasilyevich Astakhov duhet të largohen nga Italia brenda tre ditësh.

Vendimi pason arrestimin e dy ish-zyrtarëve italianë të zbulimit, të cilët dyshohen se i kanë dorëzuar Rusisë informacione të ndjeshme, përfshirë të dhëna mbi ndihmën ushtarake që Italia dhe aleatët e saj po i ofrojnë Ukrainës.