Prokuroria Themelore e Prishtinës ka njoftuar se është arrestuar i dyshuari i cili kishte kërcënuar përmes rrjeteve sociale kryesuesin e Komisionit Qendror të Zgjedhjeve, Kreshnik Radoniqin.

Gazeta ka mësuar se prokurore e rastit është Albiona Musaj.

Kurse, detaje për rastin ka dhënë zëdhënësja e Prokurorisë Themelore e Prishtinës, Kaltrina Shala.

“Referuar kërkesës suaj për informim, ju njoftojmë se, me urdhër të Prokurorit të Shtetit, është ndaluar për 48 orë një person me inicialet H.B., i cili dyshohet për kryerjen e veprës penale “Kanosja”, sipas nenit 181 të Kodit Penal të Republikës së Kosovës. Lidhur me këtë rast, Prokurori i Shtetit është duke ndërmarrë të gjitha masat dhe veprimet e nevojshme hetimore, në përputhje me dispozitat ligjore në fuqi”, ka deklaruar ajo.