Instituti Hidrometeorologjik i Kosovës (IHMK) ka dhënë një përditësim lidhur me situatën meteorologjike në vend.

IHMK-ja ka bërë me dije se aktualisht në disa rajone të Kosovës janë zhvilluar vranësira konvektive (Cumulonimbus), të cilat po krijojnë kushte për reshje lokale shiu, të shoqëruara në disa zona me shkarkesa elektrike, erëra të përkohshme të fuqishme dhe, në zona të izoluara, edhe me breshër.

“Temperatura momentale arrin rreth 32 gradë celsius, ndërsa për shkak të nxehtësisë së grumbulluar gjatë ditës dhe paqëndrueshmërisë atmosferike, pritet që këto zhvillime të vazhdojnë edhe gjatë orëve të ardhshme”, ka njoftuar IHMK-ja.

Sipas IHMK-së, reshjet nuk do të përfshijnë të gjithë territorin e Kosovës, por do të jenë të karakterit lokal, me intensitet të ndryshëm nga një zonë në tjetrën.

“Qytetarëve u rekomandohet kujdes gjatë lëvizjes në zonat ku mund të zhvillohen stuhi, ndërsa fermerët këshillohen të ndjekin informacionet meteorologjike për shkak të mundësisë së reshjeve intensive dhe breshrit në disa lokalitete”, ka njoftuar IHMK-ja.