José Mourinho ka vendosur rregulla të reja dhe më të rrepta në Real Madrid, me synim rikthimin e disiplinës, profesionalizmit dhe standardeve të larta në skuadër.

Sipas AS, ushqyerja e lojtarëve është bërë më strikte. Mëngjesi dhe ushqimet mes vakteve tashmë kanë menu të përcaktuara, ndërsa futbollistët nuk kanë më lirinë të konsumojnë çfarëdo ushqimi që dëshirojnë.

Një tjetër rregull i ri lidhet me orarin. Lojtarët duhet të mbërrijnë në qendrën stërvitore Valdebebas një orë para fillimit të stërvitjes. Çdo vonesë do të ndëshkohet, pavarësisht statusit të futbollistit në skuadër.

Ndëshkimi për vonesat do të jetë një seancë e detyrueshme në palestër, e cila do të kryhet individualisht dhe larg pjesës tjetër të skuadrës.

Edhe futbollistët e dëmtuar do t’i kryejnë të gjitha punët e rikuperimit në Valdebebas, si në mëngjes, ashtu edhe pasdite.

Mourinho gjithashtu dëshiron që lojtarët dhe stafi teknik të konsumojnë vaktet së bashku në qendrën stërvitore, duke synuar forcimin e unitetit dhe disiplinës brenda grupit.

Trajneri portugez synon kështu të rikthejë një kulturë më të fortë të disiplinës, profesionalizmit dhe standardeve të larta te Real Madridi.