Ukraina dhe Rusia kanë vazhduar sulmet ndaj njëra-tjetrës, ku Volodymyr Zelensky ka akuzuar Moskën për përdorimin e raketave të Koresë së Veriut.

Presidenti ukrainas ka thënë se sulmet në Zaporizhzhia, të cilat kanë vrarë të paktën gjashtë persona dhe kanë plagosur të paktën 19 të tjerë, kanë përfshirë raketa balistike nga aleati i Rusisë. Në Voronezh, në jug të Rusisë, depot që i përkisnin shitësit me pakicë online, Wildberries, janë goditur nga Ukraina. Kompania, e njohur si Amazon i Rusisë, është shënjestruar vazhdimisht në javët e fundit.

Sulmet kanë ardhur një ditë pasi të paktën 13 persona janë vrarë, përfshirë një fëmijë, në sulmet me dronë ukrainasë në republikën ruse të Tatarstanit, më shumë se 1 100 kilometra (680 milje) nga kufiri ukrainas.

Në një video-adresim, Zelensky ka thënë “për herë të parë” se Rusia “nuk mund të zhvillojë luftë pa përforcime nga Koreja e Veriut”.

“Sa më shumë sulme të Koresë së Veriut të ketë këtu në Ukrainë, në Evropë, aq më shumë përdoren raketat dhe ushtarët e tyre, aq më shumë ata korrigjojnë mangësitë dhe pikat e tyre të verbëra”, ka thënë Zelensky, duke shtuar se kjo përbën një rrezik për pjesën tjetër të botës.

Në fjalimin e tij, Zelensky ka përshëndetur gjithashtu një sulm ajror të suksesshëm në një uzinë petrokimike ruse në Siberinë perëndimore të hënën, duke e cilësuar atë si një “arritje shumë të rëndësishme” nga ushtria ukrainase. Ai ka premtuar “më shumë sulme të thella ukrainase, të cilat duhet t’i tregojnë Rusisë dhe rusëve se paqja është e nevojshme”.