Kryeministri në detyrë, i betuar si deputet, Albin Kurti, ka pritur në takim senatoren amerikane Joni Ernst, ndërsa ka thënë se gjatë takimit është diskutuar edhe situata aktuale politike.
Kurti tha se e ka njoftuar senatoren për “progresin e fuqishëm ekonomik të vendit tonë” dhe për përmirësimin e situatës së sigurisë së brendshme.
“E informova senatoren për progresin e fuqishëm ekonomik të vendit tonë dhe për përmirësimin e situatës së sigurisë së brendshme”, ka shkruar Kurti.
Gjithashtu, Kurti tha se i ka shprehur qëndrimin e Qeverisë se “Camp Bondsteel duhet të shndërrohet në një bazë të përhershme ushtarake”.
Njoftimi i plotë nga Kurti:
“Kisha kënaqësinë të mirëpres senatoren Joni Ernst në Zyrën e Kryeministrit, për takimin tonë të dytë bilateral në më pak se një vit.
E falënderova senatoren Ernst për mbështetjen dhe kontributin e saj të vazhdueshëm në partneritetin Kosovë-SHBA, veçanërisht në fushën e mbrojtjes dhe çështjeve ushtarake.
E informova senatoren për progresin e fuqishëm ekonomik të vendit tonë dhe për përmirësimin e situatës së sigurisë së brendshme.
Gjithashtu, ritheksova qëndrimin e Qeverisë sonë se Camp Bondsteel duhet të shndërrohet në një bazë të përhershme ushtarake, për të shërbyer si garantues i vazhdueshëm i paqes dhe sigurisë në Kosovë dhe në rajon.
Në fund, diskutuam për situatën aktuale politike në Kosovë dhe rëndësinë e vazhdimit të dialogut ndërmjet partive politike, me synim arritjen e një marrëveshjeje përfundimtare për formimin e institucioneve”, ka shkruar Kurti në X.
