Një person është shpallur fajtor nga Gjykata Themelore në Prizren për pjesëmarrje ose organizim të luftimit të qenve.

Lajmin e ka bërë të ditur Fondacioni për të Drejtat e Kafshëve, përmes një postimi në rrjetet sociale.

Sipas njoftimit, personi me inicialet I.K. është dënuar me 300 euro gjobë.

“Në një aktgjykim të fundit, Gjykata Themelore në Prizren e ka shpallur fajtor I.K. për pjesëmarrje ose organizim të luftimit të qenve dhe e ka dënuar me gjobë prej 300 euro. Rasti është inicuar pas kallëzimit penal të dorëzuar nga organizata jonë”, thuhet në postim.

Fondacioni për të Drejtat e Kafshëve ka shprehur zhgënjimin për faktin se rastet e luftimit të qenve, sipas tyre, deri më tani janë dënuar vetëm me gjoba.

“Ndonëse mbetemi të zhgënjyer që deri më tani, rastet e luftimit të qenve kanë rezultuar vetëm me dënime me gjobë, e vlerësojmë faktin që gjykata e ka njohur veprën e shkaktuar dhe ka konstatuar fajësinë e të pandehurit”, thuhet në postim.

Organizata ka shprehur shqetësim edhe për mospërfshirjen e masave të tjera të parapara me ligj në aktgjykime.

“Neni 16 i Ligjit Nr. 08/L-188 për Ndryshimin dhe Plotësimin e Kodit Penal parasheh konfiskimin e kafshëve dhe ndalimin e personit të dënuar për të mbajtur kafshë. Këto masa janë veçanërisht të rëndësishme në rastet e luftimit të qenve, ku kafshët janë drejtpërdrejt të përfshira në veprën penale”, thuhet në njoftim.

Fondacioni ka kërkuar që, përveç konstatimit të përgjegjësisë penale, të zbatohen edhe masat e parapara me Kodin Penal.