Shtetet e Bashkuara kanë njoftuar vendosjen e sanksioneve ndaj presidentes së Gjykatës Penale Ndërkombëtare (GJPN), Tomoko Akane, dhe prokurorit të lartë të kësaj gjykate, Abdoulaye Seye, i cili është përfshirë në hetimet për krime të dyshuara të kryera nga Izraeli gjatë luftës në Gaza. (The Guardian)

Sanksionet u njoftuan nga Sekretari amerikan i Shtetit, Marco Rubio. Ai e akuzoi GJPN-në me seli në Hagë se është një gjykatë “e korruptuar dhe thellësisht e politizuar”, duke pretenduar se institucioni ka keqpërdorur autoritetin dhe ka tejkaluar mandatin e tij. (The Guardian)

Sipas Rubio-s, Akane, shtetase japoneze dhe presidente e GJPN-së, si dhe Seye, shtetas senegalez dhe prokuror i lartë i gjykatës, janë sanksionuar për shkak se kanë qenë të përfshirë drejtpërdrejt në përpjekjet për të hetuar, arrestuar, ndaluar ose ndjekur penalisht zyrtarë të vendeve që nuk e kanë pranuar juridiksionin e Gjykatës Penale Ndërkombëtare.

SHBA-ja kishte vendosur më herët sanksione edhe ndaj prokurorit të GJPN-së, Karim Khan, i cili kishte hetuar kryeministrin izraelit Benjamin Netanyahu dhe ish-ministrin e Mbrojtjes, Yoav Gallant, lidhur me krime të dyshuara lufte gjatë konfliktit në Gaza. Në vitin 2025, Donald Trump kishte vendosur sanksione ndaj gjykatës, duke e akuzuar atë për ndërmarrjen e veprimeve “të paligjshme dhe të pabazuara” kundër SHBA-së dhe aleatit të saj të ngushtë, Izraelit.

Rubio nuk specifikoi se cilat veprime konkrete të dy zyrtarëve kanë çuar në sanksione. Megjithatë, sipas raportimeve të mediave izraelite, Seye po mbikëqyr një hetim lidhur me financimin izraelit të vendbanimeve të paligjshme dhe shpërndarjen e armëve tek kolonët në Bregun Perëndimor.

Zyrtarë izraelitë kishin paralajmëruar në maj se Gjykata Penale Ndërkombëtare mund të kërkonte edhe pesë urdhër-arreste të tjera ndaj ministrave dhe zyrtarëve të lartë ushtarakë izraelitë, të cilët dyshohet se janë përfshirë në dhunën ndaj palestinezëve në Bregun Perëndimor.