Agjencia e Statistikave të Kosovës (ASK) ka publikuar Statistikat Afatshkurtra të Shërbimeve për muajin qershor 2026.

Sipas ASK-së, në qershor 2026, indeksi i qarkullimit në sektorët e shërbimeve shënoi rënie prej 0,37 për qind, krahasuar me të njëjtin muaj të vitit 2025.

Sipas aktiviteteve ekonomike, rritje të qarkullimit u shënua te veprimtaritë botuese, prodhimi audiovizual, transmetimi, telekomunikimi, programimi kompjuterik dhe shërbimet e informacionit me 11,37 për qind; te baret dhe restorantet me 10,79 për qind; te veprimtaritë profesionale, shkencore dhe teknike me 7,28 për qind; si dhe te hotelet me 6,60 për qind.

Ndërkaq, rënie u regjistrua te veprimtaritë administrative dhe mbështetëse me 8,26 për qind, si dhe te transporti dhe magazinimi me 15,51 për qind.

Rritet numri i të punësuarve

Indeksi i numrit të të punësuarve në sektorët e shërbimeve në qershor 2026 u rrit me 3,27 për qind, krahasuar me qershorin e vitit 2025.
Rritja më e madhe u regjistrua te baret dhe restorantet, me 6,13 për qind. Pas tyre renditen veprimtaritë botuese, prodhimi audiovizual, transmetimi, telekomunikimi, programimi kompjuterik dhe shërbimet e informacionit me 3,61 për qind; veprimtaritë profesionale, shkencore dhe teknike me 3,42 për qind; transporti dhe magazinimi me 2,48 për qind; hotelet me 0,67 për qind; si dhe veprimtaritë administrative dhe mbështetëse me 0,49 për qind.

Fondi i pagave rritet 14,83 për qind

Sipas ASK-së, indeksi i fondit të pagave dhe mëditjeve në sektorët e shërbimeve shënoi rritje prej 14,83 për qind në qershor 2026, krahasuar me të njëjtin muaj të vitit paraprak.

Rritja më e lartë u regjistrua te baret dhe restorantet me 21,33 për qind, ndërsa pasojnë veprimtaritë botuese, prodhimi audiovizual, transmetimi, telekomunikimi, programimi kompjuterik dhe shërbimet e informacionit me 14,31 për qind.

Veprimtaritë profesionale, shkencore dhe teknike shënuan rritje prej 14,30 për qind, veprimtaritë administrative dhe mbështetëse 13,21 për qind, hotelet 12,87 për qind, ndërsa transporti dhe magazinimi 11,75 për qind.

Të dhënat e ASK-së tregojnë kështu se, përkundër rënies së lehtë të qarkullimit në sektorin e shërbimeve, gjatë qershorit është shënuar rritje si në numrin e të punësuarve, ashtu edhe në fondin e pagave dhe mëditjeve.