Marina amerikane ka prezantuar një raketë të re ajër-ajër me rreze ultra të gjatë veprimi, “AIM-424 Malice”, e cila sipas të dhënave të publikuara mund të godasë objektiva në distanca prej më shumë se 463 kilometrash.

Fotografitë e raketës janë publikuar nga DVIDS, platforma zyrtare mediatike e Departamentit amerikan të Mbrojtjes.

“AIM-424 Malic”e është shfaqur e montuar në dy lloje avionësh luftarakë të Marinës amerikane, “F-35C Lightning II” dhe “F/A-18E Super Hornet”.

Raketa është zhvilluar nga kompania amerikane “Raytheon” dhe përdor motor me lëndë djegëse të ngurtë.

Ajo është 4.11 metra e gjatë, ka diametër prej 0.34 metrash dhe peshon rreth 680 kilogramë në momentin e lëshimit

.Sipas të dhënave të publikuara, raketa ka rreze veprimi mbi 463 kilometra dhe është e pajisur me kokë luftarake me fragmentim të lartë shpërthyes.

Megjithëse fotografitë u publikuan më 22 gusht, informacionet tregojnë se testimet kishin nisur që gjatë dimrit të këtij viti.

Ende nuk ka të dhëna të plota nëse integrimi i raketës me avionët luftarakë ka përfunduar.

Megjithatë, pamjet tregojnë se “F/A-18E Super Hornet” mund të mbajë të paktën katër raketa të tilla.

Ndërkohë, “F-35C” mund t’i transportojë ato në ndarjet e brendshme të armëve, duke ruajtur profilin e tij të ulët të zbulueshmërisë.

Nuk është bërë ende e ditur se çfarë roli të saktë do të ketë “AIM-424 Malice” në arsenalin e Marinës amerikane. Ajo mund të përdoret krahas AIM-174 ose potencialisht të zëvendësojë një pjesë të rolit të saj.

Paralelisht, Forcat Ajrore të ShBA-së po zhvillojnë edhe raketën “AIM-260”, por të dhënat zyrtare për rrezen dhe karakteristikat e saj kryesore ende nuk janë bërë publike.