E ardhmja e Raheem Sterlingut është bërë mjaft e komplikuar, me sulmuesin që përballet me mundësinë e një dënimi deri në dy vjet burgim.

Lojtari i Kombëtares së Anglisë tani është akuzuar zyrtarisht për drejtim të rrezikshëm të mjetit, posedim të oksidit të azotit dhe refuzim për t’iu nënshtruar një testi droge.

Rasti rrjedh nga një aksident që ndodhi më herët këtë vit në autostradën M3, në Hampshire të Anglisë.

Sterling, 31 vjeç, humbi kontrollin e Lamborghini-t të tij, me vlerë rreth 270 mijë paundë, duke u përplasur me parmakun mbrojtës. Nga incidenti nuk pati të lënduar dhe asnjë automjet tjetër nuk u përfshi.

Në atë kohë, autoritetet e arrestuan lojtarin nën dyshimin për drejtim të mjetit nën ndikimin e narkotikëve.

Hetimi tani ka evoluar në një çështje penale, me akuza formale që e përkeqësojnë situatën e tij ligjore.

Sipas ligjit britanik, një dënim për drejtim të rrezikshëm të mjetit mund të çojë në dënim me burgim.

Policia ishte njoftuar nga shoferë të tjerë, të cilët kishin parë Lamborghini-n e lojtarit duke devijuar në rrugë pak para aksidentit.

Pas arrestimit të tij, Sterling është liruar me kusht, por do të duhet të paraqitet në gjykatë më 15 shtator.