Propozimi i kryetarit të Lidhjes Demokratike të Kosovës (LDK), Lumir Abdixhiku, që Bekim Sejdiu të jetë kandidat për president të Republikës së Kosovës pas një marrëveshje të arritur me Lëvizjen Vetëvendosje, po shoqërohet me reagime të ndryshme edhe në rrjetet sociale.

Në postimin e Abdixhikut në “Facebook”, ku ai ka bërë të ditur propozimin për kandidaturën e Sejdiut, janë grumbulluar rreth 2 mijë e 300 pëlqime dhe 59 shpërndarje, shkruan “Epoka e re”.

Ndërkaq, postimi i deputetit të LDK-së, Avdullah Hoti, i cili ka shprehur qëndrim kundër kësaj kandidature, ka marrë rreth 4 mijë e 500 pëlqime dhe 222 shpërndarje.

Kështu, postimi i Hotit ka marrë rreth 2 mijë e 200 pëlqime më shumë dhe 163 shpërndarje më shumë sesa postimi i Abdixhikut.

Megjithatë, reagimet në “Facebook” nuk mund të konsiderohen si matje e drejtpërdrejtë e qëndrimit të anëtarësisë së LDK-së apo e opinionit të përgjithshëm publik, por ato tregojnë dallimin në angazhimin që kanë gjeneruar dy qëndrimet e kundërta lidhur me kandidaturën për president.

Përplasja rreth kandidaturës së Bekim Sejdiut pritet të jetë një prej çështjeve kryesore në zhvillimet e fundit brenda LDK-së.