Deputeti i Listës Serbe, Igor Simiq, në fjalën që ia dha kryetarja e Kuvendit, Albulena Haxhiu, për të tërhequr deklarimin e bërë gjatë propozimit të bashkëpartiakut të tij, Sllavko Simiq, për nënkryetar të Kuvendit, i ka thënë asaj se e “kupton lojën” që po e bën.

Haxhiu i ka kërkuar atij që ta propozojë kandidatin e tyre për nënkryetar “sipas Kushtetutës”.

“Unë e kuptoj lojën që jeni duke e bërë. Ne paraqesim në emër të komunitetit serb në mënyrë të shkruar dhe ju e keni pranuar më 06.08 kërkesën tonë që e kemi bërë”, ka thënë Simiqi.

Por, në këtë moment, Haxhiu ia ka ndërprerë fjalën.

“Jo fjalë të tjera, jo interpretime të tjera. Bëjeni propozimin”, ka thënë Haxhiu.

“Unë jam pjesëtar i popullit serb dhe atë çfarë kemi bërë më 06.08…”, ka thënë Simiq, para se Haxhiu t’ia ndërpriste sërish fjalën.

Pas kësaj, seanca është shtyrë për të premten.