Fanfarat madhështore që presidenti Donald Trump po organizon për liderin e Kinës, Xi Jinping, lënë të kuptohet se një moment i madh global është pranë.

Në një lëvizje të pazakontë, Trump udhëtoi drejt bazës ajrore Joint Base Andrews për ta pritur Xi-n në këmbët e shkallëve të avionit të tij, kur ai mbërriti të mërkurën për një qëndrim dy netësh. Liderët biseduan së bashku me bashkëshortet e tyre, përpara se të ecnin krah për krah në një tapet të kuq. Megjithatë, pati një moment të papritur në koreografi, kur një avion që po kryente një fluturim ceremonial çau qiellin me një gjëmim të fuqishëm gjatë himnit kombëtar, duke bërë që Trumpi të stepet dhe ta rrudhë fytyrën.

Megjithatë, pamjet sugjerojnë dy liderë të mëdhenj të vendeve më të fuqishme të botës duke u takuar për ta përcaktuar fatin e planetit. Koha nuk mund të ishte më e përshtatshme, ndërsa SHBA-ja dhe Kina po avancojnë drejt një kufiri të ri teknologjik, mes paralajmërimeve nga drejtuesit e industrisë se inteligjenca artificiale mund të dalë së shpejti jashtë kontrollit, shkruan CNN.

Por spektakli mund të mashtrojë. Vizita shtetërore e Xi nuk është aspak ekuivalente me samitet mes presidentit Ronald Reagan dhe liderit sovjetik Mikhail Gorbachev, të cilat e drejtuan Luftën e Ftohtë drejt një përfundimi të butë.

Së pari, pritet që ajo të përfundojë pa një marrëveshje për mbrojtjen e njerëzimit që do t’i ngjante reduktimeve të armëve bërthamore të viteve 1980. Dyzet vjet më vonë, masa të tilla mund të përfshinin kufizime mbi zhvillimin e inteligjencës artificiale ose që SHBA-ja dhe Kina t’i ofronin njëra-tjetrës transparencë mbi industritë e tyre teknologjike, për të ndërtuar besim dhe siguri.

Ekziston ende mundësia që samiti të befasojë – megjithëse, për ta bërë këtë, do të duhej të sfidonte kodet tradicionale diplomatike të Kinës, të cilat kërkojnë diplomaci të ndërlikuar para takimeve për të siguruar rezultatet e dakorduara. Në realitet, pra, një rezultat i mirë do të kufizohej në zgjatjen e armëpushimit tregtar dypalësh të shpallur të mërkurën në mbrëmje; përpjekje të reja për të krijuar stabilitet mes Uashingtonit dhe Pekinit; si dhe iniciativa të vogla për inteligjencën artificiale, rrjedhën e fentanilit, tregtinë dhe shmangien e përplasjeve ushtarake.

Por pse pritshmëritë janë kaq të ulëta, veçanërisht kur pjesa tjetër e botës po vëzhgon ndërsa SHBA-ja dhe Kina garojnë për epërsi në një garë armatimi të inteligjencës artificiale?

Çështja e inteligjencës artificiale është veçanërisht emblematike e hendekut mes rivalëve. Secila palë mendon se mund të triumfojë dhe të dyja i kuptojnë pasojat që ka kjo për përballjen mes superfuqive të tyre: “Kushdo që fiton inteligjencën artificiale, fiton”, siç e formuloi Trumpi. Të dyja po i rezistojnë çdo kufizimi domethënës në një sektor që është jetik për mbështetjen e rritjes ekonomike. Shumë analistë besojnë se Kina është prapa në garën e inteligjencës artificiale dhe nuk do të pajtohej me ndonjë ngadalësim të ndërsjellë të industrisë. Ajo zakonisht e sheh çdo përpjekje për të kufizuar ngritjen e saj teknologjike si pjesë të një strategjie perëndimore për ta privuar atë nga fuqia globale që i takon.

Mospërputhja e personaliteteve mes Trumpit, që vepron në mënyrë të improvizuar, dhe Xi-t, që vepron me kujdes, gjithashtu nuk favorizon marrjen e vendimeve spontane. Sistemet politike amerikane dhe kineze janë aq të ndryshme – dhe gjithnjë e më shumë të orientuara për t’iu kundërvënë njëra-tjetrës – saqë ekziston shumë pak terren i përbashkët.

Dhe secila palë dëshiron të shmangë përshkallëzimet, por i mungon ndikimi i nevojshëm për të detyruar lëshime.

Rënia e fortë e shifrave të Trumpit në sondazhe, mes luftës në Iran, rrezikon të dobësojë ndikimin e tij global. Vitin e kaluar, ai zbuloi se kërcënimet kineze për të ndërprerë eksportet e mineraleve të rralla drejt SHBA-së mund ta pengonin ofensivën e tij tregtare. Dhe ndërsa Xi nuk ka pse të shqetësohet për votues të zemëruar në vendin e tij totalitar dhe mbron pa mëshirë pushtetin e tij të brendshëm, ai po përballet me një krizë në sektorin e pasurive të paluajtshme dhe probleme ekonomike në vend.