Protestat e nxënësve të shkollave të mesme në Francë, të nisura fillimisht për shkak të orëve të gjata mësimore, mungesës së mësuesve dhe gjendjes së amortizuar të godinave shkollore, janë përshkallëzuar në të gjithë vendin.

Qeveria franceze ka paralajmëruar për atë që e ka cilësuar si “dhunë urbane”, ndërsa ka njoftuar se një numër shkollash do të kalojnë në mësim online për të garantuar sigurinë e nxënësve dhe stafit pedagogjik.

Kryeministri francez, Sébastien Lecornu thirri të enjten një mbledhje të kabinetit dhe u kërkoi ministrave të anulonin udhëtimet e planifikuara, në mënyrë që të angazhoheshin në menaxhimin e situatës.

Protestat nisën javën e kaluar në rajonin e Parisit, por më pas u përhapën në pjesë të ndryshme të Francës.

Zyra e kryeministrit deklaroi se përshkallëzimi i dhunës e ka bërë “praktikisht të pamundur” garantimin e vijimit normal të arsimit publik dhe se stafi dhe nxënësit po ekspozohen ndaj rrezikut.

Ministri i Arsimit, Edouard Geffray, pritet të takohet të premten me përfaqësues të nxënësve për të diskutuar situatën dhe kërkesat e tyre.

Sipas policisë, rreth 900 protesta, bllokime dhe incidente të lidhura me demonstratat ishin duke u zhvilluar të enjten pranë shkollave të mesme në të gjithë vendin. Më shumë se 160 shkolla ishin mbyllur si pasojë e protestave.