Autoritetet federale amerikane kanë kryer një kontroll në banesën e kongresmenes demokrate Ilhan Omar në Washington, D.C., në kuadër të një hetimi penal që lidhet me dokumentet e saj të emigracionit, ka raportuar të hënën rrjeti amerikan “Fox News”.

Sipas raportimit, operacioni është zhvilluar rreth orës 06:00, sipas kohës lokale, dhe është bazuar në një urdhër kontrolli të autorizuar nga gjykata. Hetimi përqendrohet te dyshimet për mashtrim që lidhen me dokumentet e emigracionit të plotësuara gjatë fëmijërisë së kongresmenes.

Një zëdhënës i Departamentit të Sigurisë Kombëtare të SHBA-së ka konfirmuar për “Fox News” se agjentët e Hetimeve të Sigurisë Kombëtare (HSI) kanë zbatuar një urdhër kontrolli të siguruar nga Departamenti i Drejtësisë. Sipas tij, bëhet fjalë për një hetim federal që është ende në zhvillim.

Operacioni është drejtuar nga HSI dhe Departamenti i Sigurisë Kombëtare, me përfshirjen e Departamentit të Drejtësisë.

Deri në publikimin e raportimit, Ilhan Omar dhe zyra e saj në Kongres nuk kishin bërë ndonjë deklaratë publike lidhur me kontrollin.

Hetimi pas deklaratave të Tom Homanit

Kontrolli vjen pas deklaratave të bëra në mesin e shtatorit nga Tom Homan, i dërguari i presidentit Donald Trump për çështjet e kufirit, i cili kishte konfirmuar publikisht ekzistencën e një hetimi penal ndaj kongresmenes demokrate nga Minesota.

Marrëdhëniet mes Omarit dhe presidentit Trump janë tensionuar për shkak të politikave të zbatimit të ligjit për emigracionin, përfshirë operacionet e Shërbimit të Emigracionit dhe Doganave (ICE) në Minesota.

Trumpi i ka lidhur vazhdimisht këto masa me akuzat për mashtrim që përfshijnë komunitetin somalez në këtë shtet, ndërsa ka vënë në pikëpyetje edhe prejardhjen dhe shtetësinë e Omarit.

Ilhan Omar ka lindur në Somali dhe familja e saj ka mbërritur në Shtetet e Bashkuara në vitin 1995, pasi kishte siguruar azil.

Deri më tani, informacionet e raportuara lidhen me një hetim në vazhdim. Nuk janë bërë publike detaje të plota mbi provat e mbledhura dhe nuk ka një vendim gjyqësor që të vërtetojë pretendimet për mashtrim.