Prokuroria Themelore në Prishtinë, Departamenti për Krime të Rënda, ka njoftuar se një person me inicialet L.K. është ndaluar për 48 orë, nën dyshimin për kryerjen e veprave penale “Fajdeja” dhe “Detyrimi”.

Sipas njoftimit të Prokurorisë, ndalimi është bërë me urdhër të Prokurorit të Shtetit, pas hetimeve të zhvilluara në bashkëpunim të ngushtë me Agjencinë e Kosovës për Inteligjencë (AKI) dhe Policinë e Kosovës.

Gjatë veprimeve hetimore janë zbatuar edhe masa të veçanta hetimore, përfshirë shitjen dhe blerjen e simuluar të artikujve, shërbimeve apo sendeve, me qëllim të mbledhjes së provave lidhur me veprimtarinë e dyshuar kriminale.

Prokuroria ka bërë me dije se, deri në këtë fazë të hetimeve, dyshohet se dëmi i shkaktuar viktimës i tejkalon 50 mijë euro.

Brenda afatit ligjor, Prokurori i Shtetit do të parashtrojë në Gjykatën Themelore në Prishtinë kërkesën për caktimin e masës së paraburgimit ndaj të pandehurit, në përputhje me dispozitat e Kodit të Procedurës Penale.

Prokuroria Themelore në Prishtinë, në koordinim me AKI-në, Policinë e Kosovës dhe institucionet e tjera kompetente, ka ritheksuar përkushtimin për luftimin e kriminalitetit, sundimin e ligjit dhe mbrojtjen e interesit publik.