Më pak se dhjetë ditë para mbajtjes së zgjedhjeve të mesmandatit në Shtetet e Bashkuara të Amerikës, presidenti Donald Trump ka votuar herët të shtunën në Florida, duke konfirmuar mbështetjen e tij të plotë për kandidatët e Partisë Republikane.

I shoqëruar nga Zonja e Parë, Melania Trump, ai ka ushtruar të drejtën e votës në zyrën e Mbikëqyrësit të Zgjedhjeve në Palm Beach. I pyetur nga gazetarët nëse kishte votuar rreptësisht sipas vijave partiake, Trump është përgjigjur prerazi: “Shumë”.

Menjëherë pas votimit, presidenti amerikan është nisur drejt Xhorxhias për të marrë pjesë në një tubim të planifikuar elektoral, raporton “ABC News”.

Gjatë prononcimit për media, Trump ka mbrojtur edhe një spot të diskutueshëm të fushatës së kandidatit republikan për guvernator të Ohajos, Vivek Ramaswamy, në të cilin shfaqej nëna e rivales së tij demokrate, Amy Acton.

Gjithashtu, Trump ka komentuar padinë e paralajmëruar nga administrata e tij, e cila synon të kundërshtojë certifikimin e garës për Senatin amerikan në Alaskë, në rast se senatori republikan Dan Sullivan e humb mandatin për shkak të pranisë në fletëvotim të një kandidati tjetër me emër pothuajse identik.

Ndërkaq, lidhur me tensionet dhe zhvillimet me Iranin, presidenti amerikan është shprehur para gazetarëve: “Mund të më duhet ta përfundoj. Ose ndoshta do të bëjnë një marrëveshje, por nuk jam i sigurt. Sidoqoftë, ne fitojmë”.